O le manulauti tauave lea ma le manatu sa laualuga i le pulega ma le aiga faiaoga o le laumua o Sagato Pita Petelo i Clover Park na faamamafaina i le vaiaso atoa a o faailoga le Tutoatasi o lo tatou malo o Samoa.
E ui ina manatu nisi ua na o ni tamaiti ma soifua a‘e i atunuu ese, ae naunau lava ina ia aoaoina fanau i lo tatou faasinomaga aemaise le faatāuaina o la tatou gagana ma measina faapelepele.
Na amata lea vaiaso i le sisiina a‘e o le Tagavai o Samoa ma sa lagona i loto le tāua ma le faageetia a o lagiina e le fanau le, “Samoa tulai ma sisi ia lau Fu‘a.” Na sosoo ai ma le galulue ma fanau i le teuteuina ma le faamatagofieina o le ie o le malo e pei ona lausilafia.
Na vaaia le sagisagi o le fanau e fia iloa ma aoaoina a o faataitai i ai le tosiina o le laufala ma lona lalagaina seia oo ina faapipii i ai lona ula.
Na faatoa iloa ai foi e le fanau se isi o metotia a nai tina Samoa anamua a o lei oo mai ni mea faapipii a papalagi e pei o le falaoamata lea e paluina i le vai ae lē o le kelu. Na sosoo ai ma le galuega fita a le tufuga ta tatau o le valiina lea o le ata o le Tagavai i alafau o le fanau e pei ona latou naunau i ai ma moomoo i ai.
O le isi itu na faatāuaina o le faaaogāina lea o upu Samoa e tali mai ai le fanau ma faailoa mai ai foi o latou manaoga. E faapena foi i feofofotaiga i le ulufale mai ma le toe foi atu i aiga. O le lagona faagaeetia lea i le pulega aemaise le mamalu o faiaoga Samoa o loo galulue i le laumua ona e oo lava i nai fanau Irag ma Initia ua matuā malamalama lelei ma lelei le tautala, lagiina o pese Samoa faapea ma tauloto.
O le taualuga o lea vaiaso na taualuga i le gaosia o nisi o taumafa e pei o le koko araisa, siamu popo ma le faalifutalo lea na faaaogāina lava i le fofoga taumafa i lea aso e le fanau, mātua, aiga ma uo sa faatasi ai.
Na faapena foi ona faatepa ai le fanau i se tasi o aogā silisili o le ietoga e pei ona sa teuteuina ma talanoaina. Na faafaigofie ina ua faamatala i ai o le laei lea o se Tausala Samoa poo le purinisese Samoa e pei ona latou laeiina le anoano o laei o purinisese o loo i totonu o le laumua.
Na matuā logologoā le laumua i le aiuli a susuga i faiaoga lotonuu aemaise nai mātua sa lagolagoina lea faamoemoe o le laumua. O se faiva a‘e manuia ma talitonuina se tele o lona vsao i le soifua tuputupu a’e o alo ma fanau lenei faamoemoe.
O le feau momoli foi lea ina ia faamalosia pea ma faatāuaina lo tatou Faasinomaga “O A‘u o le Samoa, o le tama a le Eleele”.
Faamatalaga na tuuina mai
