Ua amataina le galuega mo le fale apitaga o le pulega a le EFKS i Melepone i Saute, i totonu o le aai o le Ekalesia i Malua, o le naunautaiga o le pulega, ia faaaogāina lo latou maota pe a usuia le fono tele ia Me.
E ui la i le vevela o le tau a Melepone i le Aso Toonai na tea nei, aso 25 o Fepuari, ae lei mafai ai ona taofia le toatele o le paia ma le mamalu lasilasi o Samoa, na afifio atu e talisapaia le faatalauula ane a le pulega mo la latou Tusigaigoa.
O le faamoemoe o le aso, e tau saili se seleni e faamae‘a ai lo latou fale.
O se aso matagofie ma le felanulanuai, e lē gata i le lalelei o le pulega ia latou togiga, a o Samoa foi na potopoto i o latou laei, ae lē gata i lea, o saunoaga mālie a o faagasolo le polokalame.
E ono Ekalesia a le pulega, o le Toeaina o le susuga i le faafegaiga ia Viliamu Finau, o le aao tusitusi o le susuga i le faafeagaiga ia Iakopo Pesaleli, o le teu oloa o le susuga i le faafeagaiga ia Kolia Tovio, ma susuga i faafeagaiga ia Melani Keilani ma Moe Tauti, ae o loo saili se faafeagaiga mo le tasi Ekalesia, lea sa galue ai le faafeagaiga faamalolo ia Amosa Apelu.
Na saunoa le toeaina e toalua foi ni faletua faamalolo o loo i la latou pulega, o Leuta Masina, ma Fetuliaina Falo, o le Tiakono toeaina foi a le matagaluega a Melepone, le tofa Tiatia Ieti o loo i la latou pulega.
Sa auai uma le matagaluega a Melepone, faatasi ai ma isi Ekalesia eseese, ona o le faaalia o le lototasi o Samoa pe a saili malo mo le Atua ma lona finagalo.
O le fofoga o le aso o le fetalaiga ia Levao Iosefa, a o le tofa a Faamaulalo Sanele Iosefo sa tu tootoo mo le pulega, ae o le fofoga o Autagavaia Alopopo sa fai ma sui o Samoa na potopoto e momoli se faafetai, ona o faaaloaloga faatupu ma teuga faatamalii na maau i ai le aufaigaluega ma le pulega, o le susuga i le faafeagaiga ia Aviti Etuale, o le faatonu lea o le matagaluega, sa tatalaina le aso i lana sausaunoaga faa-Samoa, ma na ia faaiuna foi le aso i le tatalo, ina ua mae‘a le saunoaga faafetai a le toeaina o le pulega, Viliamu Finau, ona o le maau ma le alofa tulai o Samoa, e ala i le seleni pe tusa ma le fitusefulu afe tala $70,000 na maua i le faamoemoe.
Na alalaga fiafia le pulega i faamanuia lapopoa e tolu, ae ta‘ape Samoa ma le mama ua lomi ma le agaga faagaeetia, auā ua maualuga le viiga o le Atua, ona o mea silisili ua ia faia.
Fai mai faletua ma tina o le pulega, tatou fetaui i Malua ia Me.
