Pagā lea ua faigata i ni upu ona tafiesea le matuitui o puapuaga na feagai ai le aai o Kalaiesetete ona o aafiaga o le mafuie, aemaise o le tolaulauina o suafa o i latou na maliliu ai e to‘a 185 i le sauniga faapitoa i Hagley Park i le Aso Lulu, 22 o Fepuari lea ua atoa i ai le tausaga talu ona tupu le faalavelave.
O le isi sauniga faapitoa e patino lava na o aiga o ē ua maliliu, lea sa faia i Latimer Square i le 8am. Sa vaaia le loimata maligi ma fefaauoai aemaise ai o nofoa lanu papae e 185 ua lē nofoia na faataaliolio ai.
E tusa ma le 16 atunuu eseese ua maliliu ai o latou tagata i le mafuie, faapea lanu ma gagana eseese poo le ā foi le matua o le soifua, tasi lava le auga ua ofaga mai le faitau afe ma afe o tagata e tiga faatasi ma manatua ai le faalavelave.
Sa auai le toatele o malo faaaloalogia e pei o le alii Palemia & faletua, le Kovana & faletua ma sui o le Palemene o Niu Sila, aemaise nai aiga ma tauaiga o i latou ua maliliu mai atunuu i fafo.
O le alii pulenuu o Bob Parker na saunoa e faafeiloai ma ia ta‘ua e leai se aai pito sili ona lavatia onosaia mafatiaga e pei o Kalaiesetete, ua faapea foi ona lalago faatasi tagata uma e tulai mai e toe fausia le aai.
O le faitauina o le Tusi Paia na fofogaina e le alii Palemia John Key ma Sam Johnson (Student Volunteer Army).
Na felanulanuai le sauniga faamanatu i le matagofie ma le mamalu o isi tapuaiga lotu e pei o Hindu, Muslim, Bahai, Buddah & Jewish sa faaalia lo latou valevale alofa i nai o latou tagata ua maliliu.
O le fu‘a a Niu Sila sa sisi faavaeloto i tafatafa ane o le stage faatasi ma le afi o le sulu o le malamalama, ae na lagilelei le aso ina ua taofia timu e pei ona lipotia i le tala o le tau.
Na logo faa-Tutuila le aofia a o lauina suafa o ē ua maliliu; o le alo o le atunuu lea na maliu i le pasi (late Jeff Pelesa Jnr Sanft) e lona 128 i le faasologa o le lisi, sosoo ai ma le tu faaaloalo lua minute ina ua 12.51pm (taimi na lulu ai le mafuie 12.02.2011); sa leai se gāsē a o tau fai punonou ulu i le eleele, na pau leo na lagona o le agiagi mālie ane o le savili.
Na lauina alofaaga momoli mai le malo o Amerika faapea le aigatupu i Peretania aemaise le saunoaga faalaeiau a le alii kovana Hon Sir Mateparae. Na faapea foi ona auai mai le afioga i le faipule Hon Su‘a Viliamu Sio e fia soosoo tau‘au mai i mafatiaga aemaise o loo iai le alo Samoa na maliu ai.
Na ia faaalia i le tusitala lona agaga mafatia ma toe manatua ai le susuga i le faifeau ua maliu (late Rev Lapana Faletolu), lea na auai i le uluai sauniga o le mafuie ia Mati 2011, aemaise le latou malumalu tapuai na matuā faaleagaina.
Ina ua mae‘a le tatalo faamanuia sa saunia e Rev Victoria Mathews, ona usuina lea o le pese “You raise me up” a o faapena ona faasaoloto mai e fanau laiti ni pepe felelea‘i (butterflies) e 185 mai o latou pusa, ua felelei isi i luga o laau, nisi ua faapepepepe i luga o le aofia a o nisi e lē fia o ese.
Sauniga faamanatu i le komiuniti a Samoa
O le aoauli o le aso lava lea sa faia ai se sauniga lotu i le malumalu EFKS Woolston, na taitaia e le susuga Toeaina Tumama Vili. Na tatala le avanoa mo soo se tasi e avanoa ma tapuai faatasi e toe tepa ai i tua ma le loto faafetai ae savali i luma ma le loto faatuatua.
Na auai le susuga i le faifeau malolo Samoa Mavaega (St Pauls Trinity Pacific Church) ma Rev Time Taotua EFKS. Na faaalia le latou faaaloalo ma manatua ē ua maliliu i le faalavelave e ala i le latou tutulai filemu ina ua 12.51pm.
O le afioga Tauti (Ekalesia Katoliko), afioga Leuluai Tupai (Matagaluega Metotisi) ma le susuga Seiuli (St Pauls Trinity Pacific), na fai ma sui e toe tepa ai i tua i le tausaga ma aafiaga na mafatia ai tagata, ma o nisi nei o tamā matutua o le atunuu sa afaina o latou maota aemaise fanua i le mafuie.
Ua atoa nei le tausaga talu ona lulu le mafuie, ua faaleaga fale ma mea totino, ua utiuti galuega ma tau lē lava le faasoa, aemaise ua tele soifua ua maimau, ae faafetai i le Atua e lē uma Lona alofa, ia maua pea le maopoopoga ma ia vaai solo i o tatou tuaoi ma le alofa.
