O faamaumauga a le Matagaluega o Faamaumauga (Department of Statistics) na faailoa mai i le masina ua tea i le lipoti ua ta‘ua o le “Household Labour Force Survey” ua faailoa mai ai ua pa‘ū le aofai o tagata ua leai ni galuega i le 6.3% i le masina o Tesema 2011 i lo le 6.6% o le aofai o tagata ua leai ni galuega i faamaumauga i le faaiuga o le masina o Setema 2011.
Ua faapea mai lea lipoti e tusa o le 6.3% o tagata ua leai ni galuega ua tutusa lea o le 150,000 le aofai o ia tagata. Peitai ane o loo faapea mai le faigamalo e tusa ma le 7,000 tagata ua lē o toe manaomia le fesoasoani e saili ni galuega, ma e tusa ma le 3,000 le aofai o tagata faaopoopo ua maua galuega fou e faigaluega ai, ma ua manatu le faigamalo o loo tulaga lelei pea le tamaoaiga o Niu Sila.
E lua vaega tāua e lē o faaalia manino mai e le faigamalo mai lea lipoti o loo aafia ai Tagata Pasefika. Muamua, o le aofai o tagata ua leai ni galuega poo le 150,000 (6.3%) lea sa iai i le faaiuga o Tesema 2011, e lē o aafia ai le fuainumera o latou e lē o faigaluega, ae o loo avanoa e faigaluega, ma latou te taliaina se galuega pe a maua, ae e lē o maua foi se fesoasoani penefiti mai le Malo.
O latou nei o loo saili lemu ni galuega, ua teena faafia e kamupani latou talosaga, ma o loo tau sailiili pea ni galuega i nusipepa ma talanoaga i aiga ma tagata e masani ai. Peitai e manatu le Matagaluega o le WINZ o tagata nei e lē o ‘taumafai ma le malosi e saili se galuega’ auā e leai ni faamaumauga e pine ai o loo o e saili ni galuega. (They are considered as ‘not actively seeking work’).
Ua faaalia mai i faamaumauga a le Salvation Army i le latou lipoti o le tausaga 2012 ua ta‘ua o le ‘A State of the Nation Report – The Growing Divide’ faapea e ui o loo faapea mai le lipoti a le Malo e na o le 6.3% le aofai o tagata e leai ni galuega poo le 6.3%, peitai ane e toatele tagata e lē o faamau i ia faamaumauga o loo manaomia le fesoasoani tau galuega.
O loo faapea mai le lipoti a le Salvation Army e moni e 150,000 le aofai o tagata o loo faamau ‘unemployed’ poo o tagata ia ua leai ni galuega ma o loo saili pea e fia faigaluega. Peitai ane afai e faitau faatasi ma le aofai o tagata ua leai ni galuega, ae o loo fia faigaluega, ma o loo saili pea ni galuega e faigaluega ai, ae e lē o faamau e le matagaluega a le malo o latou o loo ‘actively seeking work’, ona sili atu lea ona maualuga le fuainumera a tagata e lē o faigaluega ae o loo avanoa e faigaluega ma o loo saili pea ni galuega. E lē gata i lea o le toatele o nei tagata e lē o maua se fesoasoani tupe mai le Malo.
Ua faavasega e le Salvation Army le aofai o tagata o loo aafia i nei faamauamauga faapea:
• le aofai o tagata uma i Niu Sila = 4.5 miliona (NZ population)
• le aofai o tagata Niu Sila mai le 15 tausaga i luga o loo avanoa e faigaluega = 3.5 miliona (workforce population 15 years plus)
• le aofai o tagata o loo faamau e leai ni galuega, o loo avanoa e faigaluega, ma o loo saili ma le malosi se galuega fou = 150,000 (officially unemployed)
• le aofai o tagata o loo maua le penefiti o le ‘Unemployment Benefit’ = 60,000 (receiving Unemployment Benefit)
• le aofai o tagata e leai se galuega, o loo fia faigaluega, e lē o faamau i faamaumauga o tagata ua leai ni galuega, ma e lē o maua foi se fesoasoani tau penefiti mai le Malo = 261,3000 (total jobless, not receiving unemployment benefit, not classed as officially unemployed).
Ou te talitonu o se tulaga pito i sili ona faaletonu le aofai o tagata e leai ni galuega, o loo avanoa e fia faigaluega, ae e lē o maua se fesoasoani mai le Malo e tausi ai lona aiga.
O le isi vaega tāua e lē o faaali tele e le faigamalo, o le vaega lea i tupulaga i le va o tausaga 15 – 24 tausaga le matutua ua ta‘ua ‘ua lē toe aoga, e leai se galuega, ma e lē o iai foi i se polokalame aoga faapitoa’ (Not in Education, Employment or Training- NEET). E tusa ma le 83,000 le aofai o tupulaga talavou o loo aafia i lea vaega.
O fuainumera o tupulaga talavou ua lē toe aooga, ma e lē o faigaluega e pito i sili lava ona maualuga ai le fuainumera o Tagata Pasefika, ma e tusa e 43.3% le aofai o latou nei.
O le popolega ia te au, afai o tupulaga nei o taitai o le tatou Atunuu mo a taeao, a o lenei ua leai ni galuega, leai ma le aoga, o le ā nei le lumanai o le a latou mauaina?
O le isi itu, afai ua leai se fesoasoani mai le Malo, o le ā se tatou lava gaioiga e tatau ona fai e fesoasoani ai mo nei alo ma fanau?
Afai e iai nisi o outou alo ma fanau o loo nofonofo i le fale ua lē faigaluega, ua lē toe aoga, ou te fia talatalanoa atu i ai, poo le ā se auala e mafai ai ona fesoasoani mo latou.
Ou te lē o faapea atu a mea ou te mafai ona maua atu se galuega poo se polokalame aoga mo latou, ae ou te fia malamalama poo le ā se fesoasoani o loo manaomia e maua ai se galuega pe toe foi ai i aoga, ina ia mafai ona ou galue i ai mo latou. Faafesootai mai lo‘u Ofisa (09) 275-5345, poo le imeli sua.william.sio@parliament.govt.nz; poo le facebook.com/suawilliamsio ina ia tatou talanoa i lenei mataupu.
