O le sefuluiva tausaga o le soifua o le susuga ia Sala George Lutu mai le afioaga o Faleula, na ia manao ai na te fia uuina se $100 i lona lima, poo se afe tala, ae o le 30 o ona tausaga na ia tuua ai loa Samoa ae malaga mai i Niu Sila nei i le fia saili manuia mo lona aiga i le tausaga 1996. na ua taunuu ma faaolatia i laufanua o Aotearoa na lē mafai ona aveesea lava le manaoga o loo taoto i totonu o lona loto o le fia uu o se $100 ma ia uma le 15 tausaga ua maua se fale motu poo se pisinisi e maua, ae a uma le 15 tausaga e leai se mea e sili ai le toe foi i Samoa. Ae peitai o le tulivae ma le faalagolago i le Alii e lē tulafoaiina ai e le Atua lana fanau. Na amata galulue Sala ma lona faletua ia Satoa Lutu i le pikiina o le vine i Hastings, ma o se galuega faigata ae sa galue punoai ma le faamoemoe i le Alii e maua ai le malosi ma le fesoasoani, auā na ia lagona e lē maua se galuega ona e faaletonu le tautala i le gagana Peretania, ae taumafai pea ia tali lana miti sa naunau i ai.
O le faaiuga o Tesema i le tausaga lava lea na tuua ai loa Niu Sila ae malaga mo Ausetalia e sailiili matagi ai, ae pagā lea e toeititi lava uma le lua tausaga e lei maua mai se galuega, ae lei mapu pea le finau i le Atua i le tatalo ma le anapogi, faatasi ai ma le isi manaoga i le Atua e fia maua se galuega e mafai ona maua ai se pisinisi, poo se galuega e manuia ai le aiga. Na tali le Atua i le manaoga ma foai ai le galuega o le faiga o faamalu, ae o lona faigata e lē iloa tautala i le gagana lona lua (Igilisi). Sa iai se tasi o uso faigaluega sa fesoasoani ia te ia i lea taimi mo le faaliliuina o upu, ae sa o faatasi lava ma lona faalagolago i le Atua i mea uma.
A o galue ai i totonu o le kamupani sa fetuunai solo i totonu o le kamupani pe a leai se isi e faigaluega i se vaega, ae o le tāua ma le lelei ia te ia, ua maua ai le avanoa e iloa uma ai le faatinoina o galuega. Sa leai sona faavaivai, i le taumafai ia taunuu lava le moemitiga na tuua ai Samoa ma lona aiga. O le lona tolu o masina na galue ai, na ia iloa ai faatino galuega uma o loo i totonu o le kamupani, ae o le 5 o masina na ave ai e le kamupani e fai le course mai le 50 o tagata faigaluega i le faalauteleina o le iloa ma le malamalama e faia ai galuega, galue ma le punouai e maua lona taui, o tua atu o faigata o loo iai manuia.
Sa faapea foi ona faasavali a latou koko Samoa ma tufa le pepa e fesoasoani i nisi mea o le aiga ma le Ekalesia. Ma o lenei fesouaina na tuuina ai e le Atua ni mea se tolu i lona loto, ia fai le sefuluai, ia fai le taulaga, ma ia loto foai. Sa galue lava ma faataunuu le mea ua tuuina i lona loto ma le lilo i lona manatu o faitotoa ia e tatala mo ia ma lona aiga.
O le 1999 na malaga mai ai Sala George e auai i le aso fanau o lona tina i Niu Sila nei, ae perofeta ai se tasi o tina ia te ia, o ia e tatau ona toe foi mai e tausi lona tina, e lē sili foi mea ua maua i Ausetalia i ona manuia e maua i Niu Sila pe a tausi i lona tuaa.
O le tausaga e 2000 ia Fepuari na toe taliu mai loa le uto i Aotearoa ma toe faaauau ai le galue i totonu o le kamupani lava lenei o le King Koil ina ua tuu mai e lea kamupani e vaaia le aufaigaluega i Niu Sila; o le faamaoni i mea iti e pule i mea e tele.
E fitu tausaga sa galue ai i totonu o le King Koil ma see atu loa ma galue i totonu o le New Zealand Bed.
O le amataga o le 2007 na amata ai loa ona faatau ana masini e faagaioi ai lana pisinisi, ma sa amata mai lava i lona fale i Otara seia oo mai ina ua tatala pea manuia o le Atua ma ia faatauina ai se kamupani ua faaigoaina o le Sleepwell. Ua tali le Atua, ua aumai le $100, foai mai le $10,000.00 ma ua ia talitonu foi ua lata mai le aso o le Atua na te uuina ai le miliona; e leai se mea e faigata i le Atua. Ua fai ona fale motu, ua fai le pisinisi ona o le lelei o le Atua.
O le afioga ia Sala George Lutu e mai le afioaga o Faleula, ae o lona faletua ia Saotoa e mai le alalafaga o Fagamalo, ma e toalua o la alo. O loo fesoasoani foi i tagata ma aiga o loo lima vaivai ma fia maua le fesoasoani.\
