E lei faigofie se faaiuga o le filifiliga a mātua o le alii o Jerualem Toilalo, le tamā ia Nuuausala ma le tina ia Moliesea, ina ua ia manao e fia apalai e tauva i le polokalame mo se Junior Ambassador na te tauaveina le igoa o Niu Sila i le APCC (Asian Pacific Children Convention) e faia i Fukuoka i Iapani.
Ina ua tatala le avanoa mo fanau aoga maualuluga uma o Niu Sila, na finau ai loa le alii o Jerusalem i ona mātua e fia auai i lea faamoemoe. Sa faafaigata i mātua ona talia le manaoga ona o nei le itu, e fai si mamao o Iapani, aemaise ai e lē iloa poo ai e faatupeina lenei malaga ona e lē o faailoina mai i luga o le form pe a manuia lona taumafai ae avea ma sui o Niu Sila e auai faatasi ai ma tamaiti mai isi atunuu e 40 o le lalolagi i le polokalame.
O le tu‘itu‘i pea o le alii o Jerusalem i ona mātua na tatala ai loa le finagalo o le tamā ma le tina, ia faia ia le mea ua manao ai lo la alo. O le vaiaso mulimuli e faagata ai apalai na faatoa ave ai loa le apalai, ma e 200 tamaiti o le vasega 7 mai aoga eseese na latou finauina lenei avanoa, auai tamaiti papalagi, Initia, Saina ma Samoa.
E lua vaiaso sa tolauapi uma ai nei tamaiti auā se filifiliga o se sui o Niu Sila i lenei faamoemoe.
Ae ina ua mae‘a le camp ma faailoa mai ai o le alii o Jerusalem Toilalo o le a fai ma sui o le Junior Ambassador o Niu Sila i Iapani ma faatoa faamanino mai ai loa o le Auckland Council latou te faatupeina le faamoemoe ma o i latou foi o loo galulue faatasi ma le APCC (Asian Pasific Chiladren Convention).
O vaega na silasila i ai lenei faalapotopotoga i le filifiliina o lenei alo o le atunuu, o lana lauga o loo ola ai tamaiti matitiva, e faigata ona maua mea e mananao ai latou, e faatusatusa ia te ia o loo saoloto ma faigofie ona maua mea e manao i ai. Ma ua iai lona talitonuga a lelei ma iu manuia lana aoga o le a mafai ona fesoasoani i nei tamaiti matitiva.
Ae lē gata i lea o lona fiafia e faasoa lana aganuu o Niu Sila o loo aumau ai mo isi atunuu, faatasi ai ma lana aganuu o Samoa e faailoa atu ai foi o ia o le Samoa moni.
O se fiafiaga i mātua ia Nuuausala ma le tina ia Moliesea, ma le viiga o le Atua ona o lenei faamanuiaga ua maua ai e Jerusalem lenei tulaga e fai ai ma sui o Niu Sila, ma e ui lava na ola i lenei atunuu ae lē mafai lava ona aveesea Samoa lona atunuu pele, ma o se avanoa lelei foi lea na te tauaveina ai ma le fu‘a a lona atunuu i lenei polokalame tāua faavaomalo.
O Jeusalem Toilalo ua 11 ona tausaga ma o le lona tolu o le fanau, mai le afioaga o Fagaloa, Lepea, Nofoalii ma Fasitoo-Uta.
