Maoae le u’au’a manaia o talo mai Samoa

Sa lei vaoia i le tele o faafitauli le ulufale mai o le USO AGRIFOODS. Sa lei faalavelave lava le vevesi e pei ona tapunia ai nei ālavaa, a’o taufaaofi mai le sā na auina mai ai le container talo mai Samoa, lea ua olioli ma ‘ae’ae fiafia ai le pitonuu o Kuiniselani i lenei vaitaimi o le faama’i. E ui lava i ni faa’ite’ite peitai o loo saogalemu pea le tele o nai o tatou tagata Samoa i lenei itulagi, ua feauga lelei le pa’ū mai ma le fememea’i solo o le toatele e tapena soo se ituaiga taumafa e faaleoleo mo aiga.

E ui lava i le taufaamata’u o uaga ma lenei faama’i, ae sa lei taofia ai faitotoa e tatala mai e le Atua. O manatu ma ala o tagata e lē o le finagalo lea o le Tamā i le lagi. Ua fia ni faamoemoe, ae o le anoanoai foi o faatasiga a aiga ma ekalesia na fuafua mamao mai ae ua lē taunuu, ua tolopo ma taofia.

O le masina o Novema o le tausaga ua mavae na soalaupule ai ma faataatitia fuafuaga uma, e ui lava i lea, ae ua talafeagai lelei lona taunuu mai i le taimi tatau ma le manaomia. Na ta’ua e le susuga ia Mata’u Lalau Setefano, o le uluai taimi lenei ua ia faatino ai lenei auaunaga, a fika atu i ai poo le amataga o le tausaga nei i le faato’a mae’a ai o aso fiafia, na mautinoa ai ua mae’a vaega e tatau ona uia ma faagaioia i lenei taumafaiga i le auina mai.

Na tulivae i taimi uma e ta’u i le Atua manaoga o le loto ona tuuina mai lea e le Atua e ala i le faatuatua. Sa lei mafaia e mafaufauga faivavale o le toilalo ma le augata gofie ona vaoia pe taotaomiaina gaioiga o le mafaufau. Na afu sisina ma pologa i le tau sailiga o ni metotia ina ia taatia mai i lona tulaga lelei.

O le faamalosi a le fetalaiga a Mata’u, “A mapeva le vae, e manatu o le a ‘etu’etu ai lava e oo i le oti peitai e lē vaoia le tele o isi auala e aveese ai le ‘etu’etu ae toe savali lelei”. E faapena uma lava soo se auaunaga, a lē una’i lelei mai i le isi itu, ona saili lea pe faape’ī ona faapaleni mai le isi itu ae aua le sameme itu tasi, auā foi le lafoaia auā o le taimi ma’umau pe a tia’i ina ua toilalo i le fiugofie.

O nisi o alalafaga e pei o Fasitoo, Falealili ma nisi lava aufaifaatoaga, o loo iai o latou sao e ala i le taumafaiga mai Samoa, o le faanaunauga foi ina ia mafai ona faasafua atu, faatau atu ma toe foi le tele o seleni e atina’e ai nai aiga i Samoa ae faamalieina ai le galala o nai o tatou tagata i lenei itu o le kelope i le fia taumamafa i nei matai’ai a le atunuu.

O le susuga ia Biz Tamati o le faauluuluga lea i Samoa o le auaunaga a le USO AGRIFOODS & Produce Samoa, ae o le fetalaiga ia Mata’u Lalau Setefano o loo faafoeina le taunuu mai o containers i Kuiniselani. 

E lē o mailoa se umi e fuafua i femalagaa’iga a vaa e toe aumaia ai le isi faamomoli mai Samoa ae o loo vaaia le alumia o le uta talo ua taunuu mai nei ona o le tofo lelei o talo na auina sa’o mai i o tatou eleele ma laufanua i Samoa.

E talosagaina foi le mamalu o le atunuu o alala i lenei itulagi e tāua lava le lagolago o taumafaiga ma auaunaga a nai o tatou lava tagata auā o le tupe e taavale solo, e toe foi lava e atia’e ai aiga i Samoa ae pule lava Sitafunē i le la o lona sa, ae o upu foi a le atunuu “o a’u nei a o oe taeao.”