Select Page
Faitotoa ululate i le falepuipui Tanumalala

O le asiasiga i le falepuipui i Tanumalala sa agai ai le alii Komesina o leoleo ma nisi o le matagaluega faapea ai foi nisi o le malo Ausetalia i le faigapaaga lea ma le matagaluega o leoleo i le Aso Faraile ua mavae atu nei. Sa auai uma i ai leoleo o le falepuipui i le oo atu o le alii Komesina. O le saunoaga a Fuiavailili na agai tonu i le tele o suiga e tatau ona faia i le faleuipui, aemiase foi o aoaoga ina ia siitia le tomai o le aufaigaluega, e lē gata i lea o auupega e faaaogāina auā le puipuiga o le aufaigaluega. “Ae o le a oo mai suiga afai lava e te lē manao ai, e telē le avanoa i le faitotoa e tala ai ou aao.” O le falepuipui lea ua toe tuuina atu i lalo o le vaaiga a le alii komesina o leoleo ia Fuiavailili Egon Keil i le taimi nei. O lea foi ua faasee atu le tauaveina o le matagaluega o leoleo ma le falepuipui i lalo o le minisita o falepuipui ia Tialavea Tionisio Hunt, o le Alii Palemia ia Tuilaepa Sailele Malielegaoi sa avea ma Minisita o Leoleo.

Na faailoa e Fuiavailili i lea lava asiasiga i alii ma tamaitai o le AFP a Ausetalia, le tele o tulaga e ao ona tilotilo i ai le matagaluega i le suiga lenei, e aofia ai le aofai o pagota i le potu, o le tuueseeseina o pagota e tusa ai o solitulafono, o taimi o tauvalaauga ma le faitauina o pagota ina ia aua ne’i toe faia lea tulaga i le po, e pei ona mafua ai le solaaga ua mavae atu nei.

O le mautinoa e faauupegaina i latou auā le galuega, o lea tulaga sa fesiligia ai leoleo o le falepuipui i aupega e pei o pouvai, o se spray faatagi mata, o se talita, o fana faasipaka ina ia mautinoa e mafai ona taofia le pagota o fia faataunuuina se osofaiga i leoleo falepuipui.

O nisi o tulaga o loo tulimataia e le alii Komesina o fesoasoani nei faapaaga ma le malo o Ausetalia i lalo o le AFP. O lea lava foi asiasiga na vaaia ai le tulaga e pei e lē fiafia nisi o le aufaigaluega a le falepuiui i suiga nei, ua faailoa e le alii Komesina.

Sa asia uma lava foi poloka e ono o fale o loo nonofo ai pagota e oo lava foi i le pasima, e tusa e silia i le 60 pagota i le fale e tasi. O le potu tasi lea sa amata ai le feeseeseaiga i le va o pagota ma leoleo o le falepuipui na mafua ai le solaaga, ma auai mai loa i ai ma le potu lua ma le potu fā lea na faifai tetele ai loa. O mea sa faaleagaina e iai le ofisa o le falepuipui na matuā leaga lava komepiuta ma masini e faia ai galuega, faapea foi ona ta’ei faitotoa ulufafo. Sa faailoa foi o nisi o pagota sa o latou aufaatasi ma leoleo, ma fesoasoani atu e tau pupulu le vevesi, o ia lava foi pagota e lei sosola i tua. O le mau a se tasi o pagota sa faatalanoaina na ia faapea mai ai, o le tausaga fou e uma ai lona faasalaga ma e lei manao e toe ma’umau nisi aso o le olaga e toe faaopoopo i se fuafuaga fai faavalevalea faapea.

Sa faailoa foi nisi o mafuaaga lea e tupu ai pea le sosola o pagota i tua…”O feeseeseaiga i le va o leoleo ma pagota, e lē lelei le pulega atoa ai ma le tausia o pagota”. E lei faamaonia mai e le alii Komesina pe mo’i faamatalaga o loo i se tulaga tigaina lava le leoleo falepuipui i le maota gasegase i Motootua, i le taimi nei.

O le afiafi i le mae’a ai o le asiasiga na maua ai le faamatalaga ua faamalolo le tasi o sui ofisa sili o le Falepuipui ia Maiava Viiga, i le mae’a ai o le asiasiga ma le tautalaga a le alii Komesina. O loo maua o Maiava o le tasi lea sa faaali ona manatu i le taimi o le asiasiga lea, peitai e lei faamautu mai le tulaga tonu ua mafua ai ona faamalolo, ae o tala salatua e faapea e lē o fiafia lea tamalii i suiga o le a iai nei.

E lē o toe po se lilo i le atunuu le tulaga o le falepuipui, o se tasi o mataupu ua laualuga i ai le tele foi o felafolafoaiga a le Maota i le Palemene o Samoa. E lē gata i tupe ua alu i le fausiaina, ae lē o iai se tulaga ua atoa ona lelei ma tali mai i le saogalemu lautele o le atunuu.

O taualumaga a le faamasinoga o loo faafofoga ai i aso uma le faaseā o pagota i le leaga o le tausiga ma le faiga o i latou. E ui e lē o se matagaluega e fitoitonu i le Komesina o leoleo i lea taimi ae sa tuuina atu lava i ai le fesili a le aufaasalalau ma tusitala i sona manatu i lea tulaga. Sa aumai le tali a le alii komesina, “E lē faapea o tagata nei ua ta’usalaina ona fai ai lea faapea, e ao ona tausi lelei auā o fanau latou a nisi mātua, o tamā ma tina foi o nisi fanau e tatau lava la ona tausi lelei”.