Malo le soifua manuia Samoa, Talofa lava. O le sosooga lenei ma o le vaega mulimuli foi lea o le talaaga o le faletua ia Rosie Brown e pei ona sa amataina atu i le vaiaso talu ai.
Ua mae‘a ona e faitauina le tulaga o le amata mai o le soifuaga o le tina, ma i le taimi o a‘oa‘oga atoa ai ma le taimi muamua na faato‘ā taunuu ai i Niu Sila.
Ua faitauina foi se tasi o malosiaga o loo i lea foi tina o le atunuu e uiga i le faaaogāina o le atamai ma le meaalofa a le Atua i lona soifua auauna.
E faamaonia lea tulaga i se vaega o lana tautinoga ma lana molimau e pei ona ia faamatalaina.
E faatupu lagona, ma faatupu manatu foi lana faamanatu aemaise ai lona silafia i le faagasologa o faiga faapolokiki i totonu o Niu Sila, talu mai le vaitaimi ua mavae, ma le amataina mai o faiga faapaaga ma Samoa.
Soifua Galue/Galuega
O se tasi o vaega tele o le soifuaga o Rosie, sa ia faatāuaina ai foi le tulaga o le soifuaga i totonu o le aiga i le mafutaga ma mātua, aemaise o tuaa o le atunuu.
O le tautua ma le galue punouai i le tausia o mātua ma tagata matutua, e faamaonia foi e le tina, o le isi lea a‘oa‘oga maualuga ma le matagofie i lona foi soifuaga ma lona soifua tuputupu a‘e mai lava i lona laitiiti.
Ae o le tulaga o galuega faapolofesa e tusa ai ma le atamai faalenatura, ma le poto salalau sa a‘oa‘oina ai, sa tele lava ina galue i totonu o Faletalimalo i galuega o le faafeiloaia o malo, atoa ai ma tiute masani i totonu o ia foi nofoaga ma galuega.
E lei iai foi ni fesuiaiga i le tulaga o galuega a le tina i le va o agavaa ma tomai sa iai, e fesuisuiai lava a o totonu lava o galuega i faletalimalo ma le va ma tagata asiasi sa faaalu ai lona soifua galue.
O le tausaga e 1976 sa amata ai ona maua se feiloaiga ma se tasi o tamalii o le atunuu Tagaloa David Longe. O se vaitaimi sa ta‘ua e le tina, sa matuā telē se fesoasoani sa ia a‘oa‘oina mai ai i lea foi tamā, a o tulai mai i nisi o tofiga tāua i le malo o Niu Sila.
O le amataga foi lea o lona ofi ma fiafia e faafeiloai i le tulaga faapolokiki, ma sa tele foi ni vaega sa fesoasoani ai mo tagata lautele o Samoa i totonu o Aukilani.
O lona finau ma lona maelega mo le finauina o aiā tatau a tagata Samoa, sa oo lava ina ulufale ai i le tele o komiti galulue, faapea foi ma le galuega faafaufautua i le pulega faaitumalo i Manukau.
Faufautua mo le Pulega Faaitumalo i Manukau
O le 1986 na filifilia ai e fai ma faufautua i totonu o le pulega faaitumalo i Manukau.
E tolu tausaga sa galue ai i lea galuega, sa fai ai ma fofoga o tagata Samoa, ma tagata Pasefika i le faatonutonuina o galuega ma tulafono a le aai. Sa ia ta‘ua foi le tele o le aogā o lea foi galuega e lē gata mo ia lava latou, ae sa faapea foi ona faamanuiaina ai tagata lautele.
O le faaleleia o tagata lautele mai le tulaga o a‘oa‘oga, galuega, o le va fealoaloai, o le saogalemu, o le atinaeina o aiga, ma isi lava polokalame mo le manuia, sa ave i ai le faatāua i le vaitaimi sa galue ai i le pulega faaitumalo.
O le galulue faatasi ma le afioga ia Tagaloa David Longe sa mafai ona faataunuuina ai le tele o galuega lelei ma le naunautaiga sa faamoemoe i ai.
Faaliliu upu i le Fale Faamasino Faaitumalo Manukau
Sa maua foi le avanoa e avea ai o se faaliliu upu mo le gagana Samoa e faaleoina ai mataupu mo le mamalu o le atunuu sa nonofo faasolitulafono, pe sa ova aso i totonu o Niu Sila. O se galuega sa tautua ai mo tagata Samoa, mo manaoga manaomia i le Fale Faamasino Faaitumalo.
O isi tiute ma auaunaga sa auai
Sa avea ma sui faavae o le Fono Faufautua, sui o le Aiga Fanau Trust, sui o le Fono Faatonu o le Arahanga, fai ma sui o Samoa i le fono faatonu a Nga Tapuwae i Magele. Taitaifono mo le Pacific Care Trust, fono faatonu o le PHO, poo le tuufaatasiga o pulega ma auaunaga faasoifua maloloina. Filifilia o le sui mo le fono faatonu a le Ngati Fatua Health, o se faalapotopotoga a tagata Maori, mo le valu tausaga. Fono faatonu mo le Mangere East Family Centre, o se nofoaga mo le soifua maloloina i Magele.
O nisi o tamā ma tina o le atunuu e manatua ona o le saili malo, sa iai faatasi ma Rosie Brown
E manatua le tamā matua le susuga i le faafeagaiga ia Leuatea Sio, Agnes Tuisamoa, Tanuvasa Yandall.
O i latou foi nei e pei ona ta‘ua, sa faatautaia se savali agai i le Palemene o Niu Sila i Ueligitone, mo le talosagaina o se leitio mo tagata Samoa. Mulimuli ane sa talia e le malo, peitai sa liliu ma avea ma leitio a le Pasefika lea ua faaigoaina o le Radio 531PI, e pei ona faaauau pea e oo mai i lenei vaitaimi.
O le isi lea mafuaga o le faavaeina o lona manatu tetee i le ta‘ua fua o tagata Pasefika i soo se atinae, talu ai o le faamaoniga lava lea e lei maimauina lava ni taimi o isi atunuu e finauina ai atinae, se‘i vaganā ai lava tamā ma tina o le atunuu.
E maumaututu lava ma taofi le tina, ua tatau lava le amanaia o Samoa ma lana tautua i le Pasefika, ona o tagata lava nei sa savavali ma faalu o latou taimi e talanoa i le malo o Niu Sila mo soo se atinae.
E manatua pea ma matamata tetele i le finagalo o le tina ia Rosie, foliga ma le faamalosi o le tamā matua ia Leuatea Sio, ona o le latou savali sa faataunuu i le maota fono o Niu Sila i Ueligitone mo le mataupu i se leitio a Samoa.
O le taimi muamua foi lea na usuina ai le pese o loo lagiina pea e tagata Samoa i soo se tuufaatasiga e faia, le pese Lota Nuu na ou fanau ai.
Na ta‘ua foi ua tatau i tagata Pasefika ona faafetai ma amanaia le sao ma galuega tāua sa fitaituga i ai le mamalu o tamā ma tina o le atunuu, lea ua aeae ai ma faamanuiaina i le tele o atinae e oo mai lava i le taimi nei.
E ui ina taaofai o tagata Pasefika i le silasila ma le vaai a le malo o Niu Sila, peitai o Samoa lava sa finauina ma talosagaina avanoa e pei ona iai.
Matatia ausia
E talitonu Rosie Brown o ia se tamaitai aupito i laititi o Samoa ma Tonga sa ia muai tauaaoina le faailoga o le JP, poo le Faamasino mo le Filemu. O loo iai foi lona talitonuga atonu o ia foi o se tamaitai muamua aupito laititi o le Pasefika sa mauaina lea tulaga taualoa e pei ona ta‘ua.
Sui Tauva i le galuega Faufautua a le ABC mo le Super City
A o maua pea e le tina ia Rosie le malosi, ua faapea ona ia sauni ai e toe luiina ma finauina le nofoa o le Faufautua mo le Aai Tele o Aukilani, lea o le a tuuina faatasi i le faamalu e tasi e pei ona fuafuaina i le masina fou. (Councilor for Auckland Super City).
O le toe finauina o galuega mo le Super City, ua faailoa ai e le tina o se avanoa e faatini ai pea lana galuega fia auauna ma le fia tautua pea mo lona atunuu o Samoa, a o maua le malosi.
Sa ta‘ua e Rosie, e lē o suia lava lona loto finau ma lona naunautaiga e tu malosi mo manaoga o tagata Samoa, ma e tatau foi i soo se tasi lava o tauva mo lea tofiga ona faamaoni ma tausisi i le faamoemoe ma le sini autū o le tofiga, ae lē o le manatu mo lona lava lelei ma lona lava viiga.
O le avea ma sui tauva o le vaega a le ABC, ua o se sui muamua foi lea i le tulai mai o lenei vaega fou faato‘ā faavaeina, mo le faiga palota mo le Super City, ae ua faamoemoe e faaauau pea ona galulue mo le manuia ma le lelei o tagata lautele o Samoa ma le Pasefika mo upufai i totonu o Aukilani ma le atunuu atoa.
Ia manuia le alo atu mo le faiga palota.
