Ua galo le tigaina, ma ua mou mālie ese atu foi lagona mafatia, ae suia i lagona faagaeetia ma loimata o le fiafia ina ua tu le galuega, ma ua taunuu le miti mai le tele o tausaga ua mavae. Ua selesele ma ua uu e le Lupesina o Samoa Aoga Amata faamanuiaga tetele ma ua sauni nei e ulufale i totonu o le faleaoga fou.
O se nofoaga e matuā matagofie lona fausiaina, atoa ai ma lona faatotogaina. E maoae lava le saili malo o tagata Samoa, ma ua toe fafagu mai lea foi faitau ina ua molimauina le galuega tele ua tu nei ma ua mae‘a foi ona faatinoina e se aiga Samoa i Aukilani i Sisifo.
O le tina matua ia Faalaa, o le afioga lava lea ia Manusina Luapua Faalaa Faaiuaso, ma le afioga i le Gafatasi ia Fuimaono Pati Faaiuaso ma o laua alo ua ausia lea foi matatia, i le faatuina o se Aoga Amata fou mo le a‘oa‘oina ai o le fanau laiti, mai le pepe e oo atu i le lima tausaga.
O se faamoemoe sa amata mai i se vaega toaititi o tamaiti laiti, ma sa amata foi ua na o sina vavae muitiiti, na o se nofoaga mo taaloga a le fanau, peitai ua tupu ma ua ola, ma ua faatino foi le galuega e faamaonia ai le naunautaiga ma le miti sa afuafua mai i tausaga ua mavae.
O le Lupesina o Samoa, o le aoga mo Samoa lava e ui lava o le tina ia Manusina sa ia mauaina le miti ma ua taunuu foi, ae peitai o le faatinoina ma le faataunuuina, sa matuā lagolago malosi i ai ona alo e toafā. O le afioga ia Fuimaomo Alovale Faaiuaso ua avea nei ma tamaitai faatonusili o le aoga. O Deborah Faaiuaso ua lagolago atu i ai, a o le susuga ia Jeremiah Faaiuaso o le tausitusi (accountant) a le aoga.
O le susuga ia Junior Pati Faaiuaso o ia lea sa nafa ma le taufalemau, poo le fuafuaina ma le faatulagaina o le ata ma le faataatiaina o le galuega i fafo ma totonu. O se faamanuiaga tele lenei aoga ona o le agavaa o i latou sa tuufaatasia ma faataunuuina le miti a lo latou tina. O le tina ia Manusina ua mae‘a foi ona faauu mai le Iunivesite o Aukilani i le faailoga o le faiaoga.
O le fanau foi e pei ona ta‘ua, ua mae‘a foi ona faauuina mai i le Iunivesite o Aukilani, ma ua taulimaina foi agavaa eseese ma faailoga mo galuega ua tofia nei i ai mo le tauaveina o le Aoga Amata a le Lupesina o Samoa.
Na faamaonia mai e le tina ia Manusina Luapua e faapea, o le seleni na faamatuu mai e le malo e tauala mai i le Matagaluega o Aoga, e tusa ma le $1.3 miliona, atoa ai ma le saofaga sa sauina lava e le Lupesina, o tupe ia na fausia ai le galuega.
E iai foi ma isi vaega tupe sa talosagaina foi mai lava i le Matagaluega o Aoga, sa fesoasoani tele mo le tuufaatasia o le faleaoga fou, faapea lona faatotogaina.
O le Aso Faraile o le vaiaso talu ai, aso 27 o le masina nei lava, sa tatala ai lenei galuega tele, ma ua fuafua o le vaiaso fou o le a mafai ai ona ulufale le fanau ma faaaogāina loa le faleaoga fou.
O se nofoaga ua matuā matagofie lona anofale, ae faapea foi fafo i le lotoa, e fai lava si tele o le fanua, ma ua faamoemoe e aoga tele mo isi fuafuaga, aemaise ai mo le faatinoina o galuega mo tamaiti.
O le sauniga lotu mo le tatalaina o le nofoaga fou, sa taitaia e le susuga i le faafeagaiga o le EFKS i Sandringham le susuga ia Rev Dr Featuna‘i Liuoaana. O ia foi sa saunoa i upu faalaeiau, aemaise ai o le tatalo faamanuia mo le galuega ma le faleaoga.
O le saunoaga a le susuga i le faafeagaiga sa maitauina ai le fesootai lelei o le igoa Lupesina ua faaigoaina ai le aoga, ma le galuega ma uiga o lea foi manu i le atunuu.
Na talatala lelei e Dr Featuna‘i le gafa o le Lupesina seia oo lava ina maua le sini ma le autū e fetaui lelei ma fesootai ai ma le galuega a Aoga Amata.
Lauga Rev Dr Featuna‘i Liuoaana:
O le Lupesina o le igoa o le lupe lanu paepae i Samoa, ma e masani ona faauigaina lona igoa e faapea, e mamā, e atamai, e faatusaina foi i le agaga poo le mana.
O le Lupesina o se igoa e tāua tele, ona o le vaitau lenei i Samoa mai le masina o Iuni e oo atu ia Setema, o le taimi e faaigoaina o le Oloamanu. O le uiga o le Oloamanu e faapea o pesega a manu, poo le tuufaatasiga o leo o manufelelei.
O le vaitau lenei i Samoa e masani ona totogo ai fuga o laau, ma fua taufuifui ai laau i o latou fua masani. O le laau o le mosooi o ona fuga e manogi tele ma e sasala ma faasalalauina lona manogi.
E masani ai le Lupesina ona fiafia tele i le fuga o le mosooi, ma o ia foi na te taitaia mai isi manu ma faatosina mai se vaega tele, e aai ma pepese ai i le manogi o le mosooi.
O ia foi na te aumai le fiafia ma faatupu le olioli i isi manufelelei e mafua ai ona faaputuputu faatasi ma ofaga faatasi ma pepepse faatasi. O le Lupesina Aoga Amata la ua lē ese ma le uiga o le igoa o le lupe i Samoa, aemaise ai ona uiga faatino.
O le ata manino foi lea o le nofoaga ua tatalaina nei, ma ua tatau ai ona pepese fiafia ma alalaga le fanau auā ua mae‘a ona fausia ma faataunuuina le faleaoga fou mo le a‘oa‘oina.
O le a fua atu ai foi ma avea o se nofoaga e auina atu le manogi lelei ma le sasala mo le lumanai o isi fanau, ma isi nofoaga.
E manatu o le aoga a le Lupesina o le a aumaia ma tatai mai le toatele o fanau, ina ia tofo ma fiafia faatasi i le suamalie o le fuga o le a fua atu ma sasala atu ina ia tosina mai ai nisi fanau ma pepese fiafia ai.
O se vaega o le faamalosi a le susuga i le faafeagaiga sa fai ma luitau, ae sa matuā logomālie foi i le faafofoga a le toatele aemaise ai o malo papalagi ma isi gagana sa auai ma molimauina le faamoenmoe.
O le lauga sa faaaogāina ma sa tusia foi i le gagana Peretania, ae sa taumafai e faaliliuina i le gagana Samoa, ina ia sologa lelei ai le faitau, aemaise lava o tamā ma tina matutua o le atunuu.
