E soo se fonotaga tāua a se faalapotopotoga, poo se aulotu foi, e tāua le silafia o tiute i le tulafono o i latou na taloina le fono.
E tāua foi i tagata uma e i totonu o se faalapotopotoga poo se aulotu ona silafia latou tiute fai, ma a latou aiā tatau e fesili ai pea a lē malamalama, a o lei faia le fono. O le mea e sili ona tāua o le fesili ma malamalama a o lei faia ni iugafono e afaina ai le lumanai o le tou
aulotu poo le tou faalapotopotoga. Afai o oe e te i totonu o le faalapotopotoga poo le aulotu, e iai lau aiā tatau e te taofia ai se fonotaga, e pulepuletutu e le ta‘ita‘i o se fonotaga.
O lou tiute mo le lumanai o le falapotopotoga poo le aulotu, o le fai o lau faaiuga e te ioe i se mataupu ua e malamalama ai.
O tiute i le tulafono o tagata o le faalapotopotoga poo se aulotu, ia aua le na o le ioe i se mataupu ona o le taitaifono o se tagata e maualuga sona tulaga poo se faifeau. Aua le ioe i se mataupu e lei malamalama ma mautinoa le ala ua e ioe ai. E tatau ona e fuafua i le lumanai o le faalapotopotoga poo se aulotu, ma tupulaga fai a‘e; ae e te lei ioe, pe tetee foi i se mataupu na talanoaina i se fonotaga tāua.
O le a ou faaaogāina ni fono se lua na faia a se Ekalesia i Aukilani lata mai nei e faamanino ai le tatou talanoaga i lenei mataupu.
Soo se mataupu tāua e talanoaina, poo se fono a se aulotu poo se faalapotopotoga, o le tiute o le tagata lea na tāloina le fono, poo lana failautusi, le ave o le tusi i tagata fono uma lava, pe vaiaso pe lua vaiaso a o lei faia le fono. O lenei tusi poo le “Notice of the meeting’ e tatau ona ta‘u manino ai i tagata ia e tālo e omai i le fono, le mataupu o loo fia talanoaina. E tatau ona faamanatu i tagata, a lē mafai ona auai, ia aumai ni faanoi.
A iai se palota e fia fai i lea fono, e tatau i luga o le tulafono, ona ta‘u manino i tagata e iai le palota e fia fai i lea fonotaga, ma ta‘u le mataupu e fia palota ai.
O ni pepa uma e tatau ona faitau ai le au fono a o lei oo i le aso o le fono, e tatau ona lafoina uma nei pepa i tagata fono a o lei faia le fono. O le logoina o mataupu e talanoaina, mataupu e fia fai ai se palota, poo ni pepa o iai mataupu e tatau ona talanoaina a o lei faia le fono, o tiute nei o lē na te ta‘ita‘iina le fono poo lana failautusi.
E mafai e se aulotu poo se faalapotopotoga ona tagi i le fale faamasino e soloia se iugafono e lei uia auala e tatau ona fai, ia e ta‘ua i luga.
O le Ekalesia lea ou te ta‘ua i luga o se Ekalesia o loo tau saili ni auala i luma, e fofō ai faafitauli o loo feagai ma lenei Ekalesia. Ona e lē o iai se faifeau a lenei Ekalesia, o se faifeau sa tofia mo le taimi nei lea na te vaaia lenei Ekalesia.
Ua faateia lenei Ekalesia e ta‘ua i luga, ua tulai atu le faifeau fai le fono i le aso lava na oo atu ai lea faifeau. E faitau mai i luma i le taimi o le fono le tusi e ta‘u mai ai i tagata o le Ekalesia le auga o le fono. E lei mauaina e tagata o le Ekalesia se “notice” e tālo ai le fono, ma logo mai ai i le Ekalesia le auga o le fono, poo ā foi mataupu e talanoaina e lea fono. O lona uiga o le fono faateia.
Sa fai le palota e le faifeau, ma sa lē faaaogāina e le faifeau se faatagi atu a se tina matua o le Ekalesia e faapafala le mataupu se‘i fono le Ekalesia muamua, na o latou, pe a tulai le faifeau. Sa ou fesiligaia lenei tina pe aisea sa na ia faia ai le talosaga lea e ta‘ua. O
le manatu sa faaalia e lenei tina, e lē mafai e le Ekalesia ona talanoa saoloto le latou mataupu ina ia malamalama tagata uma, ae lei faia se palota, pe a iai le faifeau.
Sa saili e lenei tina matua ma nisi matutua o lenei Ekalesia se fesosoani i le tulafono ona ua lē anamaia e le faifeau le augani a le tina matua, ae faamalosi le faiga o le palota a lea Ekalesia ae o loo pogisa le Ekalesia i mataupu sa lau mai i luma e le faifeau, i le taimi na fai ai le fono.
O lenei tusi sa lauina mai i luma i le taimi lava na fai ai le fono a le Ekalesia e le faifeau, na tusia e se faifeau papalagi. E na o le tasi lava le tagata o le Ekalesia na lafo i ai le kopi na maua e lea tagata o le Ekalesia i le afiafi o le Aso Toonai ae Aso Sa le fono. Talofa i le
Ekalesia, na aveina le faamalosiina o le fono e le faifeau, toeitiiti ai malepe le Ekalesia. Ue feteenai mātua ma fanau.
O le faalua ai lenei ona soona fai ma faaaogā sese faiga o fono a lenei Ekalesia. Sa loma se fonotaga a le Ekalesia ma le faifeau mo se mataupu sa fia talanoaina e le Ekalesia. Ae te‘i ua fai le fono ae laga ane e le faifeau, e lua ni faifeau tamaitai e lē o iai ni Ekalesia i le taimi nei, e oo atu i se taimi o le po lava lea. Sa folafola mai e le faifeau i luma i le po o le fono, o nei faifeau tamaitai ua tofia e o atu e vaaia latou, ma galulue ma atina‘e lenei Ekalesia.
Tusa ua lua ni fono faateia a lenei Ekalesia.
Mo le silafia, e soloia i le tulafono ni faaiuga e faia i nei fono e lua, ona e lei uia auala faaletulafono.
Tusa pe iai auala i le tulafono e aveese ai ni faaiuga sese o ni fono e fai ae lei uia auala faaletulafono, e leai se aogā pe a malepelepe Ekalesia, ma feaina‘i mātua ma fanau, talu ai le faiga sese o tiutefai a latou o loo mautofi poo faifeau. Ia iloa ma le malamalama, e iai i luga o le tulafono, vaega e faatapulaa ai le pule, a i latou o loo mau tofi ma faifeau.
A malepelepe se Ekalesia, o tagata o le aulotu poo le Ekalesia e tauaveina le tiga ma le faigata o le o ese ma se Ekalesia ua tele ni tausaga o alu ai le afu ma le malosi.
Poo le faifeau papalagi poo faifeau Samoa, e leai se pule faamalosi a se faifeau e na te faia ai ni fonotaga e pei ona ou ta‘ua i luga.
A sa‘o le faiga o tiute o tagata e iai tofi ma faifeau, e lē tau aveina ni mataupu i le fale faamasino. E ala lava ona ave mataupu i le tulafono ma le fale faamasino, ona o se auala lea e soloia ai faaiuga fai sese, ma toe poloaia e le faamasinoga le faiga sa‘o o se fono.
A ave mataupu i le fale faamasino e totogi le fale faamasino, totogi loia e faia ma gaioiga. E lē o le loia e mafua ai ona ave mataupu i le fale faamasino. A lē sa‘o se mataupu e afaina ai le lumanai o tagata o se Ekalesia, poo se isi faalapotopotoga, o le tiute o le loia o le fautua tagata o se faalapotopotoga poo se Ekalesia ia latou aiā tatau i le tulafono, ma auala e mafai ona foia ai faafitauli.
E iai lava taimi e ave ai le faaaloalo, e iai taimi e te fesiligia ai pe tatau pe lē tatau se faaiuga pe a e lagona e sese
E tutusa aiā a tagata uma i le tulafono. E pei lava ona tusia i le Tusi Paia, e alofa le Atua i tagata uma.
