E o’o atu le tatou nusipepa nei i Poutasi i le vaiaso ua mavae o taofia ai le alo o le tina ia Sui Fipe i auga o le faama’i o le misela.
Sa talanoa mai le tina ma lona faanoanoa tele ona o le aso lava lea 5 o Tesema o le Aso Tofi o le vaiaso ua mavae na teu ai lona alo tama e 12 tausaga le matua.
O lona alo lea sa ta’ua e Sui na maliu atu i le falema’i tele o Tupua Tamasese Meaole i Motootua i le Aso Faraile 29 o Novema o le tausaga nei.
E lei mafai ona auai atu le tina ia Sui i le teuina o lona alo ona o loo nofo i le falema’i faaitumalio i Poutasi e vaai le isi ana tama teine o Fofoa 13 tausaga le matua o loo taoto foi i le falema’i ona o le misela.
O le tulaga faanoanoa tele i le talanoa mai a le tina ona o loo vaaia le faaletonu foi o Fofoa, ua lē tautala ma o loo mafatia foi i le maliu ai o lona tuagane.
“O loo faanoanoa lava Fofoa ona o lona tuagane ua avea, ae o lea foi ua vaai le sasao mai ai o le misela i ona foliga, faatoa vaaia lea tulaga ina ua uma ona tanu si a’u tama. A’o lei sasao mai, sa muamua lava vina i le tiga o le ulu,” o le saunoaga lea a Sui Fipe.
O le aso 22 o Novema o le Aso Faraile lea na uluai avatu ai lona alo ua maliu ia Foalima i le falema’i faaitumalo, ae sa faapea mai e lē o lavea i le misela. Sa tala atu vai ma toe foi ai loa i le fale.
“Na ma toe oo mai i le falema’i ona o le fiva tele atoa ai ma le pata o vae, peitai sa tala atu foi fualaau ma fai mai e toe o i le fale.”
E oo atu lava i le Aso Toonai o lea lava vaiaso o loo tumau lava le fiva, ma faapea ai loa ona toe ave foi e Sui lana tama i le falema’i, ae sa faapea mai lava e inu pea fualaau.
O le tolu aso lumanai ai na ave ai loa e Sui lana tama o Foalima i le falema’i i Motoootua ona ua tigaina tele, sa taofia ai loa ma togafitia seia oo ai lava ina maliu i le Aso Faraile 29 o Novema, 2019.
“Sa fai lava togafitiga, ae na maliu lava si a’u tama i le Aso Faraile.” O le faamatalaga a le tina talu lava ona avatu si ana tama i le falema’i e lei faapea mai lava ua maua i le misela.
O le tulaga faapopoleina sa vaaia i mātua nei ia Sui ma Tamalemai, ona o lea e taofia Fofoa i le falema’i, ae o loo tigaina foi le isi a la tama 8 tausaga i le fale i le taimi nei.
E toe oo atu la tatou nusipepa i le falema’i i Poutasi i le Aso Faraile na mavae nei ua tea Fofoa, ae o loo agai Sui ma lona aiga e ave le la tama 8 tausaga i Apia i le falema’i i Motootua mo togafitiga.
O loo tuua’ia e le malo aemaise le faauluuluga o le soifua maloloina, mātua i le tuai ona aumai o fanau i le falema’i. Na oo lava foi saunoaga a Leausa i le lē faia o tui o fanau ma le manatu māmā i ai o tina i saunoaga faapea…”E maua le fagu bingo i le ato a tina ae lē maua ai se pepa tui o fanau.”
Peitai o le talitonuga o Sui ma lona aiga, ana taofia lana tama ma faia togafitiga mo le misela i le uluai taimi na aumai ai ailoga e ma’umau le ola o si ana tama o Foalima.
