Faamae’a polokalame a Le La o Samoa Dance Academy 2019

Alo ma fanau o loo auai i le La o Samoa Dance Academy

Sa faatumulia le Hall a le Hay Park School i Mount Roskill i le mamalu o le atunuu sa auai atu i ai i le Aso Toonai na se’i mavae nei, a’o faalauiloaina ai taleni siva a alo ma fanau a Samoa o loo a’oa’oina i Le La o Samoa Dance Academy. Sa vaaia le sanisani fiafia atu o nai mātua o fanau sa faia a latou faafiafiaga i lea po, ma faaalia foi le loto faafetai o nisi o mātua, ona o le aogā o lenei aoga siva, e lē gata i le a’oina ai o le siva samoa, ae ua faaleleia ai foi ma le gagana Samoa a nai o latou alo. Sa vaevaeina lea po i ni vaega se fā, e aofia ai faafiafiaga mai le vaega o laiti poo juniors, primary, intermediate ma le seniors. Sa faafiafia ai foi i lea po le ausiva a le Malu Taupou Dance Group, Tatau Dance Academy faapea le alii pese lauiloa o Kas Futialo.

Nisi o matua ma a latou fanau ina ua maea le polokalame i lea po

O le faamoemoe sa taitaiina ma faaiuina e le Susuga i le faafeagaiga o Laumua Tunufai o le Seventh Day Adventist Church i Panmure le faamoemoe i lea po. Sa ia faia foi ni upu faalaeiau i le ausiva ina ia saga faaolaola pea le taleni siva i alo ma fanau o Samoa i Niu Sila. O le MC i lea po, o le alii ia Kevin Oge.

Le tama ia Pula Brown, faatasi ai ma faiaoga siva o Lana Aoina ma Vaimaua Brown-Letele

O lenei aoga siva o loo aofia ai tamaitai e to’a 24, i le va o le lima tausaga faasolo atu i le sefulu ono tausaga le matutua. O loo taitiaina lenei aoga siva e le tamaitai ia Lana Aoina, o ia foi lea o le Director poo le Faatonu o le ausiva a tamaitai talavou, Le La o Samoa Dance Group, faatasi ai ma le lagolago a nisi o faiaoga siva e pei o May Lavea Iakopo, Sheila Fausa, Vaimaua Brown-Letele ma May Cordtz. E faatasi i le vaiaso ona faia polokalame a lenei aoga siva i vaiaso taitasi. O le a toe amatalia lenei aoga siva i le tausaga fou, ma o le a toe faatinoina ai foi se isi a latou faaaliga (showcase) i le faaiuga o le tausaga.