Po ua faaaoga fesoasoani o le sunami e saili ai ekisi o le palota?

Ua oo i taitai o le Malo molimau mai nisi o le aufaigaluega o loo feagai ma le faamaopoopoina ma le tufatufaina o fesoasoani o mafatiaga o le galulolo e pei o taumafa, ua taua ai se tasi o faipule ua ia ave nisi o ia fesoasoani i nuu o lona itumalo faafaipule e lei afaina tele i le galulolo.
Na faateia se tasi o aulotu o se tasi o nuu o loo fai le galuega o lo latou falesa, ina ua tu atu le loli ma taga araisa ma isi taumafa ma le faaupuga o le fesoasoani mo le galuega a le ekalesia, e pei ona faaalia e se molimau e lei mafai ona faamaonia ona o le faigata ona aumai se faamatalaga ae o loo feagai ma le tufaina o fesoasoani ona o le fefefe i aafia ai a latou galuega pe a masua atu i le lalolagi ia gaioiga le manuia.
Na faaalia e le molimau, e taunuu le loli ma le uta o taumafa o loo iai se sui o le komiti o faalavelave faafuasei o loo faia lana galuega o le saili o aiga na mafatia e alu sao i ai le fesoasoani.
Na logo e le tagata lea le sui o le komiti ma faailoa i ai lea vaaiga, ma faapea ona tuusao atu ai le lipoti i le Palemia.
O le aliae o ia tulaga ua faaalia ai e se sui o le komiti na mafai ona talanoa mai i le tusitala, o loo suesueina pea ia lipoti atoa ai ma tuuaiga i le faatau e nisi o taga araisa o fesoasoani i faleoloa laiti ae maua atu isi oloa e pei o sikaleti ma le avamalosi.
E le o manao le alii Palemia e salalau atu i tua ni lipoti o nei faiga le manuia, i lana saunoaga i se vaega o tusitala na latou feiloai, atonu e toatasi se tagata o faia, ae a alu atu i le lalolagi nei lipoti ona faapea lea o tagata ma atunuu na alolofa mai o loo fai uma e tagata ia uiga le manuia.
“Vaai tuutuu i le loloto le tofa a o lei faia na ituaiga o lipoti, aua o le taimi lava e salalau atu ai, faapea loa ma tagata o lona uiga o tagata uma lava o loo faia na uiga le lelei, atonu pe toatasi o loo faia ae silafia foi o le lago mate e tasi e namu leaga uma ai le suauu manogi lelei”, o le tala lea a le alii Palemia ma soisoi.
O pusaoloa poo containers o fesoasoani mai le mamalu o le atunuu o aumai ma alaala i Niu Sila aemaise le aai o Aukilani na amata tufa mo nuu e pei o Lepa, Saleapaga, ma Lalomanu ae o le vaiaso na tea nei na faaoo atu ai ia fesoasoani mo isi afioaga o le Mata Aleipata na aafia faapea nuu o Falealili, Siumu, Lefaga, Saanapu, ma Manono na aafia i le galulolo.
O le vaiaso foi na tea nei na taunuu ai fesoasoani o pusaoloa tetele mai Amerika. O loo naunau nisi faalapotopotoga tumaoti e faatino lava e latou le tufaina o a latou fesoasoani ona o le mumusu i avatu i nisi ae faalima poto ai foi ma le oo le tele o meaai ma lavalava i nai aiga ua mafatia.