“O teuteuga o le Faavae e faatumau ai le amiotonu a faipule”Tuilaepa
Ua taoto atu nei i le Kapeneta se toe iloiloga o le taimi e faamamalu ai le teuteuga lona lima o le tulafono o faigapalota ua aiaia ai le soloia o nofoa o faipule o le palemene, pe a toe sui se pati e alu i ai, pe faamavae foi ma le vaega faaupufai sa lesitala ai ma ave i ai lana lagolago ina ua maea se faigapalota.
O le teuteuga foi lea ua aiaia ai ma le soloia o se nofoa o se itumalo faafaipule i le palemene pe a toe faia ni mafutaga a faipule ma nisi tagata e i fafo mai o le palemene, i le faamoemoe e tapenapena ai mo se faigapalota e sailia ai tofi faipule o itumalo i le palemene.
O le mau a le Tautua Samoa Party o se vaega faaupufai e lei lesitalaina faaletulafono, ae o loo mafuta faatasi ma nisi o faipule sa i totonu o le SDUP, le HRPP ma sui faipule tutu taitoatasi mo le sauniuni ai i le palota o le 2011, ua faia fuafua lea teuteuga ma faamalosia atili i le faaopoopo i le vaega 46 o le Faavae o le atunuu, ina ia talepe ai le latou mafutaga ae foi e toe faatino palota laiti.
Na saunoa le tasi o faipule o Safata sa lagolago i le HRPP mo le tele o paeaiga, le Afioga Palusalue Faapo II, ma ia fesiligia le Malo pe aisea ua tulituliaupu ai lava latou, ae e le suia ai se faigamalo i le aofaiga e toaiva o sui o le Tautua Samoa.
O le mau lea a le sui faipule na faalava ane ai le alii Palemia ma ia lalau le palaai o lea sui o Safata.
Na saunoa Tuilaepa afai e maumaututu le talitonuga o Palusalue o loo mau le finagalo o le itumalo i lana filifiliga ua faia, e le tatau la ona inainā i le teuteuga ae sauni e toe alu i le itumalo e fesili i ai, ona iloa ai lea lona toe maua o le nofoa, ae afai e ese le faaiuga o le a iai, ia o aga ia o faigapalota.
Na fesili foi le faipule o Gagaemauga Numera 2, le Afioga Levaopolo Talatonu, pe aisea ua faamamalu ai isi vaega o le teuteuga i le masina o Iuni o le tausaga e 2011 ua maea le isi palota tele, ae o le teuteuga i le itu i vaega faaupufai a uma ona pasia e le palemene ona ave lea i le kapeneta e toe iloilo ai le taimi e amata faamamalu ai.
O le talitonuga o Levaopolo Talatonu e pasia loa le teuteuga lea, faamamalu loa i le tausaga nei.
O lona uiga o le taunuuga lava lea o le finauga o le soloia o o latou nofoa ae toe foi i palota laiti. Na saunoa le alii Palemia ma ia faamamafa le agaga autu o le teuteuga ma le suiga o le faavae ua faaopoopo i ai ma aiaiga fou o le tulafono o faigapalota.
Saunoa Tuilaepa e le o iai se manatu o le Malo e talepe le Tautua Samoa, ae o ni teuteuga e faamautu ma faamausali ai le pati faaupufai, e pei ona faaitiitia mai le aofai o sui e mafai ai ona lesitala mai le toa selau i le valu.
O le taofia o le femoumouai ma le tausisia e faipule o faiga amiotonu o le pogai lea o teuteuga o le tulafono o faiga palota ma le teuteuga o le faavae o le atunuu e pei ona saunoa le taitai o le Malo.
Faaalia e Tuilaepa e ao ona tausisia e faipule a latou tautinoga na fai ma itumalo aemaise tagata palota i vaega faaupufai e lagolago i ai, poo le avea foi ma se sui tutu toatasi.
O teuteuga fou o le a le toe talia ai se faipule e faamavae mai se pati ona toe avea ma faipule tutoatasi.
E faamavae loa avanoa le nofoa ma le toe iai se tofi ae foi e toe filifili le itumalo e ala i se palota laititi.
O le isi tulaga ua manino mai i le teuteuga o le pati lava e tauva ai se sui, o le pati lava lena e alu i ai e lei toe suia, seia vagana sui e tauva tutoatasi ae manumalo e mafai ona ulufale atu i se pati faaupufai ma lesitala ai o se sui o sea vaega faaupufai.
Ae afai lava e le fia avea ma sui o se pati e tutumau lava lona tutoatasi seia maea le lima tausaga o se paeaiga.
