Solofa atumauga o Canterbury ina ua seia le talita

E leai se vaimaa e lei fuliina e le au lakapi malosi a Southland a o finauina le la taaloga faitaulia o le talita ma lona uso tuaoi o Canterbury lea ua latou manumalo ai, ma ua piriota ai foi ma le lima sefulu tausaga o faatalitali, ina ua solofa i lalo atumauga lanu lauava o Canterbury i le AMI stadium i le afiafi o le Aso Tofi ua mavae atu nei.
O le talita o le a faamaepaepa nei i Invercargill e faaiila ai mo se taimi umi seia aulia foi le isi taamilosaga fou talu mai le taimi mulimuli na latou umia ai le talita na o sina tasi le taaloga ae toe mamulu i le tausaga 1959.
O se taaloga maitauina ma na faatumuina le malae taalo o le AMI stadium i le au tapuai mai Invercargill ma foliga mai e pei o loo faia le taaloga i o latou laueleele.
Na vaaia le tau fai malolosi o au e lua, ae sa uigaese le maitau atu i le defence ma le tinou o le au a Southland, e ala i le taumafai e tali atu ma faafetoai metotia a Canterbury, ma sa pei o se tupua tau matemate lenei taaloga matagofie.
Na mālōlō i le afa ina ua tutusa ai i le tai tolu, ae peitai ina ua toe amata le afa mulimuli, sa matua faafouina le malosi o Southland ma e le mailoa poo le a se upu faamalosiau a le faiaoga na fafaga ai mafaufau o tama taalo lea na matua leai ai se vaimaa o Canterbury e lei fuliina ma manumalo ai.
O ai uma o le taaloga na maua mai i sala e tolu a Southland (Robinson) atoa ai ma le kiki kolopu (drop goal) a Canty (Stephen Brett). Sa maitauina le fetagisi o le au tapuai a Southland, o loimata o le fiafia ma sogi atu le isi i le tasi, ae na vaaia foi le malolo faatamalii a si au sa umia le talita e ui ina ua lafotuina ona atumauga i lea afiafi.
Talu ai la a o faagasolo pea le taamilosaga o le Air New Zealand Cup, lea foi la sa faatalitali i le iuga o le taaloga a Aukilani mai Matu o Bombay Hills ma Waikato mai Saute o Bombay, ia ua faapiriota foi e Aukilani le avanoa mautinoa o Waikato e sao atu ai i le semi-finals ina ua latou manumalo i le 26-18, ma ua patipati fiafia ai Hawkes Bay ua ofi atu i le taamilosaga o le semi-finals.
O le tulaga ua iai nei, o le a taaalo Canterbury ma Hawkes Bay i le semi-finals muamua i le AMI stadium i le Aso Faraile 30.10.2009, ae o le taaloga lona lua, o Ueligitone ma Southland i le Aso Toonai, 31.10.2009 aua le sailiga o le siamupini, ae o le a tapuai fiafia le NPC ma toe timata le upega mo le tausaga fou.