Sauni Santa e tufa meaalofa mo tamaiti na aafia i le sunami

O se tasi o laasaga ua ausia ma faasolo i ai tapenaga a le komiti a le Tsunami Samoa 2009 Fund Appeal, lea o loo taitaifono ai le tofa ia Olo Elise Puni, ina ua maea ona tuuina atu nisi fesoasoani i Samoa i le tele o tulaga e pei o fomai ma le au tausi soifua (dortors & nurses), o taumafa ma vaiinu, o lavalava e oo lava foi i masini mo le faamamaina o le otaota talu mai le aafiaga o Samoa i le galulolo.
O nisi o vaega sa tapenaina e le komiti lava lenei, ma momoli atu i le atunuu mo le faamoemoe lava lea e fesoaosani ai, o nofoa faataavalevale mo nisi o tama ma matua mamai i Manono, e oo lava foi i mea faigaluega e fesoasoani ai mo galuega toe tau amata mo nai alalafaga sa mafatia tele, aemaise o le tulaga o faleui sei tulou le gagana, sa faapea ona le emo ai le silasila ma le tagatagai a le taitaifono ma le komiti i tapenaga sa taumafai i ai ma faatinoina.
O le isi tulaga taua tele o taumafaiga uma nei, ona sa malaga faapitoa lava foi le taitaifono ma sui o le komiti e silasila ma faamaonia, aemaise sa feiloai atu i tagata o loo manaomia vave le fesoasoani mo le taimi nei. O le saunoaga manino lea ma le malamalama a le taitaifono le tofa ia Olo Elise Puni.
O le toe taliu mai o lea faigamalaga i Niu Sila nei, ua fuafua ai loa ma le faamoemoe o le tagai lea i fesoasoani tau i meaaoga, ma ni meataalo mo alo ma fanau laiti sa mafatia, ma o loo manaomia pea se fesoasoani i ia foi tulaga. Ua fuafua o le a le faapito manu ia tasi ia i latou o loo tigaina tele. E oo mai i le taimi nei, ae o le taumafai lava foi i se mafai ina ia oo atu lea vaafaaola, i soo se tasi lava sa afaina.
O le silasila mamao a le komiti ua faatulagaina ai lea polokalame, ona o le vaitaimi ua agai i ai le tausaga, o le vaitaimi o le Kerisimasi, o taimi ia e faatino ai faiga meaalofa e pei ona masani ai le soifuaga nei. Na faailoa foi e le tofa ia Olo Elise Puni, ua sauni nei la le Tamā o le Kerisimasi le alii o Santa Claus poo Santa Pita Fatialofa ma le vaega e agai atu i Samoa e faatino ma momoli aloaia taumafaiga ma le gapatia o le atunuu iinei sa foai ane ma alolofa mai i le faamoemoe o Santa ma lana komiti. Ua iai foi le isi vaega ua tapena i ai lea lava komiti, o le saunia lea o tamai leitio, o le a tufatufaina mo aiga i le atunuu ina ia faalelei ai pea le tulaga o fesootaiga, ma silafia ai lapataiga uma mai le vaega faapitoa e nafa ma le tulaga o mala faalenatura.
E tusa ma le toluafe ni meaalofa ua fuafua e saunia ma malaga faatasi atu ma Santa i Samoa. Ua faamaonia mai foi e le tofa ia Pa‘u Teleiai Su‘a Edwin Puni, o se tasi o sui o le komiti, o lea ua iai le aumalaga, e o toalua ma Santa i le tufatufaina o meaalofa.
O le tamaitai Miss Samoa Niu Sila – 2009, Christina Tuiataga Faafili, ua filifilia e malaga faatasi ma Santa, ae le gata i lea ua mafai foi ona fesootai mai le Sui Palemia o le malo o Samoa, le afioga i le Laau na Fausia, Misa Telefoni, o ia foi le isi ua sauni ma tapena ane mo lea lava faamoemoe.
O le polokalame o le taunuu ai o Santa i Samoa, ua fuafua o le aso muamua o Tesema e amata ai le tufatufaina o meaalofa, ma o le a amata i fanau o loo i totonu lava o maota gasegase i lea taimi, ona sosoo ai lea ma tamaiti o le Atu Falealili, i le Aso Lua lea o Tesema lava. A maea lea ona sii lea i le Mata Aleipata i le aso tolu lea e sosoo ai, mo le faaauauina pea o le galuega a le Tamā o le Kerisimasi.
Ua iai foi le faamoemoe o le a faaiu lea polokalame i le motu i Manono, i Aiga i le Tai, lea foi sa aafia tele i le galulolo.
E fa aso sa feagai ai le komiti ma le faamaopopoina o le foai a le mamalu o le atunuu sa agai ane i le nofoaga na faamautu ai i Otahuhu. Na momoli foi le faafetai a le komiti i le loaloa o Samoa sa oo ane ma faailoa le agaga lagolago i lenei taumafaiga, aua lava le manuia o alo ma fanau a le atunuu sa mafatia.