Faalauiloa le tautua pese faaleagaga a Sara Tino Molia Pose

O loo i Aotearoa nei le tamaitai pese ua lauiloa i Amerika ma Hawaii aemaise foi Samoa i lana taleni ma lana meaalofa pese mai le Atua, le tamaitai o Sara Tino Molia Pose, o le alo o Rev Ioane P Molia.
O loo malaga faatasi mai Sara ma lona alii o Tino Pose, ona o faiga malologa ma asiasiga i aiga, uo ma ē masani i lenei foi vaitaimi o le tausaga.
Peitai o se moemitiga lenei ua leva ona faananau i ai le loto ma le agaga o le tamaitai pese, ina ia faalautele ma faalauiloa lana taleni e fesoasoani atu ai i soo se tagata, e fai lea ma lauga i finagalo ma loto e faaolaina ai se agaga ma faamalosia ai e ua faavaivai faaleagaga, ma toe faamanatu atu i tagata le taua o le faaolataga a le Atua lea ua tatou manuia ma mautinoa ai le Atua, ma saunia ai o tatou agaga mo le toe faaafio faalua mai o lo tatou Faaola o Iesu Keriso. Ua maea nei la ana koneseti e lua sa faia lea i le aso 17 o le masina nei i Henderson Intermediate Hall i Lincoln Rd, ma lana koneseti mulimuli i le Aso Toonai na tea nei, aso 24 o Oketopa, lea sa faia i le Hall a Sir Edmund Hillary Collegiate i Otara.
Sa vaaia le agaga faa-Kerisiano moni i le lagolago mai o nisi o susuga o faafeagaiga, faletua aemaise le mamalu paia o Ekalesia eseese sa auai i ia sauniga faakoneseti faaleagaga (CD launch) i le faaalia o taleni ma meaalofa faaleagaga o nisi foi tamalii iloga i nei taleni ma meaalofa faaleagaga, e le gata i pese a o siva ma isi lava ituaiga taleni ma meaalofa ua faaaogaina ai e le Atua alo ma fanau o si o tatou atunuu o Samoa i Niu Sila nei.
O se vaaiga mataina ma se vaaiga e viia ai le Matai o i le lagi ona o alo ma fanau amata mai le 7 tausaga e oo atu lava i le autalavou i taleni ma meaalofa mai le Agaga Paia ua faaaogaina ai i latou a o laiti.
O moomooga, talosia ia faaauau ai pea ma ola faaaogaina e le Atua nei alo ma fanau mo lona finagalo.
Sa momoli le faafeatai a le tamaitai pese ia i latou uma sa oo atu ma lagolagoina lona faamoemoe i taimi uma na faataunuu ai ana koneseti faaleagaga.
O loo faamautu nei Sara Tino Molia Pose ma lona alii i le maota o le susuga i le faafeagaiga ia Lene Molia ma le faletua ia Laaivasa Molia o loo galulue i le Ekalesia a le Auso Kerisiano i Ranui Henderson.