A’o sauni atu taaloga tele i le masina fou (SPG) e faia i Samoa, e lē o samasamanoa le mafaufau o le susuga ia Master Frank Frost ua lauiloa i Ausetalia faapea foi isi atunuu i le taaloga o le Taekwondo, i le tau faasauni atu o ana vaega e faisao mo ia taaloga tele. O le tamaloa e faigata ona mate’ia e tagata o se Samoa se’i vagana ua tautala mai, ae o le manatu o nisi, o se Saina mao’io’i lava le tamaloa i lona faatinoiti ma lona ofu kalate ua faapea ai lava, o se uso o Jackie Chan. Na fesiligia i sona finagalo pe o le a sana molimau ma se taua o lana vaega i tagata lautele aemaise aso tetele e pei ona sauni i ai le autaalo i Samoa.
Na ia ta’ua le aoga tele o lenei taaloga, (Taekwondo) e lē gata e puipuia mai ai tagata uma aemaise lava tamaiti mai faalavelave, ae o le lava o le kalate e mafai ai ona e tetee atu (defend) oe pe a osofaia faafuasei i se tulimanu e te lei mafaufauina, a’o le sini autu, o lau faamalositino ia paleni lelei ai lou soifua maloloina. Ua molimauina le tele o ona itu lelei i le faasaoina mai o i latou na a’oa’oina i lenei a’oga, ua iai o latou tomai faapitoa. E o atu nisi ae fai mai lava nisi, pei o tausaga ua mavae sa tele Samoa a’o le taimi lenei, ua agai atu i isi atunuu e pei o Saina, Initia, Maori ma papalagi, ma o se fiafiaga tele le lagolago a nai mātua ma aiga.
O le masina o Me i le aso 13, na malaga ai le susuga ia Master Faalavelave Frank Frost i Samoa, ma faia ai se TKD Semina (Training & Gradings) a nisi o alo e toatolu auā le sauni atu mo le SPG i le masina fou. O loo iai nei isi tamaiti mai isi atunuu o loo koleniina ma a’oa’oina i le Taekwondo i Samoa e pei o Niu Sila, France ma Aferika, o latou mātua o loo galulue i Samoa, ua fiafia tele e a’oa’oina lenei taaloga.
O le kalapu a le Frank Frost Taekwondo Australia, o loo faaopoopo mai pea tamaiti i taimi uma ona o le fia a’oina lava o le taaloga O le tufa atu o lenei faamanuiaga, o loo ua iai le faamoemoe ma le tatalo, ina ia faatuputeleina le aoga ma le taua e a’otauina ai soo se alo, poo soo se isi lava i lenei taleni. E manaomia se Pulega lelei latou te faatinoina ma faafoeina le Taekwondo i Samoa.
O loo galulue faatasi ma se tasi o Grand Master Lee, o loo fesoasoani e fai meaalofa mai i toniga, ma isi vaega e moomia tele i le taaloga (equipments) ma nisi mea mo le kalapu i Samoa. E talitonu Frank ma faatuatua i le Atua o Ia e ona taleni, o le a alualu ai i luma lenei taumafaiga auā se tautua mo Samoa ma tagata lautele.
Ua fuafua o le aso 25 o le masina lenei o Iuni o le a malaga mai ai le susuga ia Kaino ma nisi o le autaalo e toafa, faatasi ai ma officials e toalua e tauva i le Taekwondo Australia Open e faia i Carrara Gold Coast auā le tapena atu mo le taaloga o le South Pacific Games. O loo sologa manuia le kalapu a le Taekwondo i Samoa e pei ona faaauau ai pea koleniga i Matautu, i le KL Security. O le susuga ia Mr Kaino Thomsen Fuataga o loo faiaoga ai, o ia foi o le Head Instructor o loo ia umia nei le 3rd Dan Kukkiwon Black Belt, faatasi ai ma ona uso latiti ia Friiz 2nd ma Zoe 1st Dan.
Ua vavala ataata o taulelei i le miti ua amata ona tino mai. O Tesema i le 2018 na faataunuuina ai le faamoemoe sa koleni ma a’oga ai i vaega eseese uma o le Taekwondo mo le 6 tausaga.
O le faiga lea o le Grading mai le 5th Dan Black Belt Master mo le isi Degree o le 6th Dan Grand Master Black Belt ma ua faamanuiaina uma ia vaega, e maualuga pea le viiga o le Atua e ou taleni ma manuia.
