Le vaega a le Masina Vaaia

O le manulauti lea o lenei tausaga, sa faaautū i ai le Vaiaso o le Gagana Samoa i Aotearoa nei. O lenei manulauti, sa filifilia faapitoa lava e le FAGASA. E lē gata i le Vaiaso o le Gagana Samoa, ae o le Autū foi lea e taulai uma i ai Tautalaga a le fanau mai le Tausaga 5 e oo i le 8. Sa fatufatu agai i ai manatu ma mafaufauga o alo ma fanau o loo i le Ofaga a le Masina Vaaia, i Sutton Park, Magele i Sasa’e. 

O la ta gagana Samoa, tū ma aga, o meaalofa silisili ia ma le tāua mo i ta’ua, mai le Atua. E ui lava la ina sa faafaigata i nai fanau ona faasoa ma talanoa agai i le Manulauti o le 2019, ae ina ua fesiligia e susuga i faiaoga ma faatalanoa le uiga o le Lalaga, Siosiomaga atoa ma le Lumanai, o iina na amata lalaga mai ai manatu ma mafaufauga o le fanau, e ala i o latou siosiomaga e tolu.  Aiga, Aoga ma le Ekalesia. O ofaga ia e lalaga ai lo latou ola a’oa’oina, e ala i le faalogo, usitai ma le faaaloalo.  O le aiga, o le mafutaga mafana lea ma mātua, uso ma tuafāfine poo tuagane. E a’oga ai le tama ma le teine i le tautala, auā o le aiga, o le falea’oga muamua lea o alo ma fanau. O le agoa, e a’oa’oina ai e le fanau le poto salalau ma lana gagana lona lua. O le ekalesia, e fesoasoani i le galuega a mātua, ina ia maua faatasi e le aiga, le malosi faaleagaga ma le poto faale-Tusi Paia.

I le ata o loo i luga, na maofa ai susuga i faaamasino, i tautalaga a le fanau, mai lava i le Tausaga 1 e oo i le Tausaga 8.  O fanau sa maua le tulaga muamua, lua ma le tolu i le Tausaga 5, 6, 7 & 8, o i latou ia o le a fai ma sui o le Masina Vaaia mo tauvaga a Aukilani. Afai e mau tulaga ai, ua agavaa i latou mo le tauvaga a le FAGASA i le tausaga lenei.

E momoli atu ai le faafetai tele lava i le Afioga i le Peresetene o le FAGASA, le tofā ia Faatili Iosua Esera, o le Pule A’oga foi o le a’oga a Sutton Park, faapea foi le Faalapotopotoga a le FAGASA i Niu Sila nei, mo le filifilia o le Manulauti tāua tele mo lenei tausaga. Ua toe fafagu ai i alo ma fanau lalovaoa a Samoa ma Aotearoa, le tāua o le faatāuaina o o latou ofaga, e tapena ai o latou olaga mo le lumanai.

O le faafetai sili foi i le mamalu o mātua, i la latou pitolaau, i le unaiina o alo ma fanau ina ia mitamita, faamalolosi, ma faaaogāina pea le gagana muamua i taimi uma, aemaise o le a’oina o tautalaga a nai fanau.  Tau lava ina ia faamanuia pea le Atua ia te outou mātua, faapea le susuga ia Faatili Esera, ma faiaoga, i lo outou faafoeina pea o ola a’oa’oina o nai fanau.

Faamatalaga na tuuina mai