Na sisiva ma fai le lape le ‘au a Teine Samoa ina ua manumalo i le pine auro i le faaiuga o taamilosaga Kilikiti i Tauana’imato.
O Samoa ma le ‘au malosi a Papua New Guinea na tauva mo le pine auro ma manumalo ai Samoa. O le ‘au a tama na manumalo i le pine apamemea.
O se faaiuga matautia lea mo le taaloga o le Kilikiti i totonu o le atunuu ina ua maua pine i taaloga a tama ma teine. E ono le aofaiga o atunuu na tauva i le kilikiti e iai Vanuatu, New Caledonia, Fiti, Cook Islands, Papua New Guinea ma Samoa.
E mamao le manumalo a teine i le taaloga ma PNG. E fa ‘olo na manumalo ai teine Samoa i le taaloga faaiu. O Papua New Guinea na muamua tatā ma maua ai ‘ai e 72 i ova e 20 ae 7 a latou pe.
Ona ta ai lea o Samoa e tuli ‘ai ma maua ai ‘ai e 73 ae toe 9 polo na totoe. E na’o le 6 pe na iai.
O le lua ai lea o manumalo a Samoa ia Papua. Na feiloai muamua i le taaloga o le taamilosaga i le Aso Tofi na manumalo ai foi Samoa i ‘olo e ono.
O isi taaloga a teine na manumalo ai ia Fiti i ‘olo e ono 4/129 mai ova e 16.5, ae ta Fiti maua na’o le 126 ae uma a latou ova e 20. I le taaloga ma Vanuatu na manumalo ai Samoa i ‘ai e 17.
O Samoa na muamua ta maua le ‘ai e 82 ae tuli Vanuatu ma pepē uma ae na’o le 65 ‘ai i le ova 18.1.
O le ‘au a tama na sue pine apamemea ma New Caledonia. O Samoa na muamua ta maua ‘ai maoa’e e 241 mai ova e 20, e lei maua e New Caledonia ‘ai o Samoa.
O isi taaloga a tama na faia’ina Samoa ia Vanuatu i ‘ai e 32 ma sao ai Vanuatu e sue pine auro ma PNG, ma manumalo ai PNG i le pine auro.
