Lua faia’ina a le Aunetipolo a Samoa i le World Cup

Samoa 35 Scotland 53

Samoa 48 Uganda 69

Samoa 24 England 90

Na faia’ina uma taaloga e tolu a Samoa i lana pulu o loo tausinio ai i le taamilosaga a le Netball World Cup o loo faia nei i Liverpool i Egelani. 

O loo pulu faatasi Samoa ma Egelani, Sikotilani ma Uganda. O le taaloga muamua na feiloai ai Samoa ma Sikotilani a’o Sikotilani ma faia’ina ai i ‘ai e 53 i le 35 a Samoa. 

O Tee Salanoa ma Sanita Too na feagai ma tiute togipolo a Samoa i le taaloga lea. E lima togi a Tee na sao ma le 10 a Sanita i la pasene 83% mo le taaloga ma Sikotilani. O le isi na tu malosi i le taaloga lea mo ‘ai o le ‘au o Toa Tanimo e 18 ato na ia maua, ma fesoasoani i ai Eseta Autagavaia na muaina isi togi e 2 mai togi e tolu. 

E tai tutusa lava ‘ai a le ‘au i kuata e fa – 7,9,10 ma le 9. A’o le isi itu o le taamilosaga i le Pool D na feiloai ai Egelani ma Uganda na malo ai Egelani i ‘ai e 64-32. 

Ona sosoo ai le ma taaloga faalua o ‘au uma ia. Na feiloai ai Samoa ma Uganda ma toe faia’ina ai foi le ‘au 48-69 a Uganda. 

O Tee Salanoa na sii lana pasene o togi na sao i le 96% na maua ai togi e 25 mai le 26 o ana togi. A’o Sanita na sao lana 20 mai le 25 o togi. Ae na fesoasoani i ai Toa Tanimo i ato e tolu mai togi e fa. I le taaloga a Egelani ma Sikotilani na faaalia ai le mata’utia o Egelani ina ua manumalo 70-34. O Egelani lea e sosoo ma Samoa i le taaloga lona tolu o le taaloga faaiu foi lea le Pool D. 

E lei manuia foi taumafaiga a Fiti, le isi ‘au a le Pasefika, na faia’ina Fiti ia Jamaica 29-85 i lana taaloga amata. Toe pa’ū ia Aferika i Saute 35-90. 

I taaloga e lua a Niu Sila manumalo ai ia Malawi 64-45 ma Barbados 78-25. Ae malo Ausetalia ia Northern Ireland 88-24 ma Sri Lanka. 

Pool D 

England 64 Uganda 32

Scotland 53 Samoa 35

England 70 Scotland 34

Uganda 69 Samoa 48

England 90 Samoa 24

Aunetipolo a Samoa i Liverpool

Ann Helen Nuualiitia, Ariana Luamanu, Toa Tanimo, Brooke Amber Williams, Eseta Autagavaia, Gene Nafanua Solia-Gibb, Lenora Misa, Rachel Rasmussen, Sanita Too, Afi Lafaialii-Sapolu, Soli Ropati, Tee Salanoa