Sa gūgū lava ma lē magagana Sakaria, i le faalavelave na pa’ū ai le laau ma maliu ai Lotufou Livingston Sakaria i le Aso Sa 25 o Setema 2016. Na saunoa le tina ia Foloi Sakaria, “E lē galo tiga, ma e matuai lē mafai lava ona galo, ae o loo onosai pea ma inu ae tuu atu i le Atua.
O galuega masani a le ekalesia S.I.S.D.A.C na galulue ai, sa toso laau ai foi Lotufou faatasi ma nisi o tagata lotu, ona o le agaga tautua lotu aemaise le vaai i le Atua ma le auaunaga, lea na tuu atoa i ai loto, agaga, tino ma mafaufau e auai atu ai i galuega ta laau i Aso Sa, na tulai mai ai le faalavelave ina ua pa’ū se laau na tipi i le taimi o le galuega i luga o le alii talavou 14 tausaga, o Lotufou. E lei mafai ona toe iloa e Lotufou se mea mai le taimi na tupu ai le faalavelave, na auina atu i le falema’i mo se laveai peitai, o le lua aso mulimuli ane na maliu ai o ia.
E talitonu o le faalavelave ua tulai mai ua motusia faafuasei ai le mafutaga mafana ma Lotufou, e tatau ona fai se a’oa’oga tele ma ia vaai toto’a i ai tagata lautele aemaise le ekalesia a le SISDAC, ina ia mataala i le saogalemu ma le malupuipuia o tagata uma. O le naunautaiga, ia avea le maliu o le atalii ia matuai faamamafa ai lava le saogalemu, e ala i le faia o a’oa’oga faapitoa, ma le faaaogāina o vaega e ao ona moomia mo le puipuia mai i faalavelave.”
Na lilo lava i manatu se faalavelave matuiā, aua e lē o se finagalo foi lea o se isi peitai e momoe lava ma manū e lē fati ae sau mala e atia’e. E maliu Lotofou faatoa 14 ona tausaga, semanu ua atoa le tausaga lenei lona 17 tausaga pe ana faapea o ola mai lava. E lē o maua se to’afilemu o manatu ma lagona o Foloi ma Sakaria ma si a la fanau ona o Lotufou o le pele, o le uii foi o le aiga.
O le toe lalaga mai o lagona mafatia o mātua ma le aiga i le motusia faafuasei o le mafutaga ma Lotufou, ona o le faamasinoga o loo tālia nei se faaiuga, i le va o le Ekalesia S.I.S.D.A.C ma le ofisa o le Health and Safety sa faagasolo i le Ipswich Magistrate Court. O le itu tagi o le faamasinoga o le ofisa a le Health and Safety, o loo avea ai le aiga o Lotufou ma molimau. O le itu tetee o le Ekalesia a le S.I.S.D.A.C.
O se fesootaiga ma le faafeagaiga le susuga ia Pr Johnathan Siofele o loo fai ma sooupu a le ekalesia S.I.S.D.A.C na ia ta’ua, “E lē o galo Foloi ma Sakaria ma si fanau i talosaga a le ekalesia, ma ua matuai misia foi i latou i totonu o sauniga. O le tiga ma le ao pogisa ua ufitia ai si o latou aiga, e lagona foi e le ekalesia le tiga alofa ona o lenei faalavelave na tulai mai, sa lei mafaufauina. Saunoa Pr Johnathan, o loo teena e le Ekalesia moliaga ona o le ekalesia e lē o se pisinisi (The Samoan Independent Seventh Day Adventist Church Queensland Inc). Na ta’ua foi o le saogalemu o le mea lava lea e silasila i ai le tagata ia.”
Peitai na ta’ua e le sooupu a le Health and Safety, “O loo matuai lagona pea le faanoanoa, ma e faamaise le faigamalo i le faalavelave na tulai mai ia Lotufou Livingston Sakaria, ia iai pea faamafanafanaga i lona aiga pele, uo ma le community Samoa. O lenei mataupu o se faamanatu tāua tele ia Kuiniselani i soo se falefaigaluega ma pisinisi, ia nofouta ma faatāua le puipuiga o le saogalemu.”
Na saunoa le sui o le Health and Safety a Kuiniselani, e tatau i faalapotopotoga e aofia ai ma faalapotopotoga e lē o galulue mo ni polofiti (non-profit organisation) ona tausisia le saogalemu o tagata uma i soo se taimi e fai ai ni galuega poo ni gaioiga e ono lamatia ai le soifua o tagata.
O loo maua uma faamatalaga e moomia mo le puipuiga o le saogalemu i le upega tafailagi: www.worksafe.qld.gov.au
Ua mae’a ona iloiloina molimau o le faamasinoga ma ua tālia nei se faaiuga o le mataupu.
E tusa o le 4 i le 6 vaiaso e tālia ai se faaiuga o le a fofogaina lava i le faamasinoga maualuga i Ipswich.
