Galuega 26:24-25 (faitau atoa le mataupu)
Ua molia e Iutaia ma lamalama se mea e fasiotia ai Paulo, ma oo ai i le faamasinoga le tuliga si‘a a si vaega lea.
Ua alu le molimau ma le tautinoga a le aposetolo e uiga i le liliuina o ia, ma lona soifuaga faasaua i le ekalesia sa iai, seia oo ina faasalavei le alii o Feso ma faapea; “Paulo e, ua e valea; o le tele o lou sue i tusi ua avea ai oe ma vale.” Ae tali Paulo, ou te le valea.
E faamatala atu e Paulo le suiga manaia ua iai lona olaga, mai le olaga tuai i se olaga feliua‘ina, soifuaga fasioti tagata ma le faasauā i Kerisiano, ae manatu o Paulo ua leaga le mafaufau. I se isi faaupuga, o Paulo ua
pa le vaa.
O manatu ia e taatele ma soona lafo i lenei foi vaitau, faapea ua popoto, popoto toe valelea ma liu lotu i tala‘iga fou. Sa lalau ai foi Paulo e ona tagata, lea lava foi e oo mai i le taimi nei ma faalogo pea i ai.
E ta‘u atu e Paulo le moni o le faaolataga ua ia iloa e ala ia Iesu, ae lalau lona valea.
Ae tolu ni faataitaiga o loo tautino ai Paulo, na lē talia ai e le faamasinoga ma manatu, o Paulo ua valea.
• O lana molimau. (13-22).
Fai mai Paulo, “o le tu tonu o le la, na ou iloa atu ai i le ala le malamalama mai le lagi, ua sili lona pupula i le la…” O le talitonuga o tagata a‘oa‘oina i lena vaitau, e leai se isi pupula e sili atu i le pupula o le la, a o lea fai mai Paulo, na taia o ia e se pupula uigaese, e sili atu i le la. O se mea valea lea ia Feso ma latou uma sa iai.
• O lana mau ia Iesu. (14-18).
E le gata i lea, ae fai mai Paulo sa faalogo i le siufofoga ua fai ane ia te ia: “Saulo, Saulo, se a ea le mea ua e saua mai ai ia te au? O le mea faigata ia te oe ona e aa i tui. Ona ou tali atu lea, le Alii e, o ai ea oe? Ona fetalai mai ai lea o ia, O a‘u o Iesu ua e saua i ai.” Ua tetei le faamasinoga i le vaega lea o le mau a Paulo. Latou te lē talitonuina lea mau, auā e faapefea na fai ane Paulo o Iesu sa fetalai ane, a o le tagata lea o Iesu sa fasiotia?
Ua lē toe iai se Iesu, ua oti, ae o lea ua sau le faamatalaga a Paulo, o ia lea sa tautala ma ia i le ala i Tamaseko. Ua atili ai lo latou lē talitonu ma manatunatu, e sa‘o lava o Paulo ua
leaga le mafaufau.
• O lana tautinoga.
Sa iloa uma e tagata, o Paulo o le tagata Iutaia atamai toe mapolotu. O le tagata filigā i lana tapuaiga, e leai se isi e faatusaina lona poto. E taualoa, mauoloa ma tulaga lelei i totonu o le aai. E alolofa i ai ana uo, ae matata‘u i ai tagata Kerisiano ona o le tamaloa faasauā. A o lea ua faamatala ane, ua ia lafoai ma tuua ia mea uma ina ua faalogo i le siufofoga o Iesu. O ai se tagata mafaufau e galue mo lona olaga atoa ia faaputu ma atinae lona manuia, ae toe lafoai ona ua talanoa ma se tagata ua oti?
• O lona valaauina.
Fai ma na vaai i se malamalama uiga ese, sili atu i le pupula o le la. Fai mai sa talanoa ma le tagata sa oti a ua toe ola. Ae atili ai na mausali i loto o le faamasinoga,
e sa’o ua valea Paulo. Ina ua faaauau lana tala, o ia ua valaauina e fai ma aposetolo mo nuu ese, ua atili ai ona nenefu le aufaafofoga. Faapefea ona fai ma aposetolo, a o ia le tagata sa faataugāina le aupaia? Ae faapefea foi ona filifilia mo nuu ese, o fili ia o tagata Iutaia?
Ua tasi moemoe le lagona ia Feso, o
Paulo ua valea.
Samoa e, e lē valea Paulo. E sili atu lona tauleleia sa iai, ae ina ua iai i le malamalama o Keriso, ma faalogo i le siufofoga o le Alii, ona suia lea o ia. Ua ia mautinoa ai lona faasinomaga, ae atili ai na nenefu mafaufau o tagata lē talitonu.
Afai ua teena oe e nisi ona ua e iloa le malamalama e sili atu i le lā, ma ua e faalogo i le siufofoga o lou matai, ia tumau ai.
Aua ne‘i toe faaluafesasi, ae ia tali atu ma le faatuatua e pei o la Paulo, ou te le valea; ae ou te tautala atu i upu moni ma le
faatuatua. Soifua.
