Ua tele faamaumauga o suesuega i atunuu i fafo e pei o Amerika, Finland, Saina, Kanata ma le tele o atunuu oloo aumau ai tagata e eseese a latou gagana, ua faamaonia ai le aoga tele o polokalame e faaaoga ai le gagana muamua a le tamaitiiti mo se taunuuga lelei o lona aoaoga.
O le ala foi lea ua faamatuu mai ai e le Ofisa o Aoga le faaauau pea ma le toe faaopoopo o polokalame oloo taua, “Achievement Through Pasefika Languages”.
Ua naunau le ofisa e faatutuina nei polokalame i totonu o ekalesia, ina ia galulue faatasi ai susuga i faafeagaiga ma matua o ekalesia e faataunuu nei polokalame.
O le tausaga ua mavae 2012, sa galulue ai sui o le ofisa i Aukilani i Sisifo e faamalamalama fuafuaga faataatitia a le ofisa ma faalauiloa nei polokalame, ina ia fesoasoani i le faafitauli ua leva ona fetaiai ma tagata Pasefika, o le maualalo lea o tulaga o aoaoga a le toatele o fanau Pasefika, aemaise le toatele e le pasi suega o le NCEA i aoga maualuluga.
Ua talitonu, o le mautinoa ma le mautu o le iloa, tomai ma le malamalama o le tamaitiiti i mataupu i lana gagana muamua oloo malamalama lelei ai, o le faigofie foi lea ona faaaoga lea iloa, malamalama ma le tomai, e faatino ai galuega i le gagana lona lua [Igilisi], le gagana lea o le aoao ai ma suesue ai lona tomai.
E momoli le faamalo ma le faafetai i pule ma taitai o polokalame i aoga amata i Niu Sila oloo latou faatinoina polokalame, oloo faaaoga ai nao le gagana Samoa.
Ua molimauina le amata fiafia o fanau i aoga ona e amata ma le mautinoa ma le mautu o le manatu ma le lagona, o au o le Samoa.
Molimauina ma le fiafia e faiaoga tulagalua oloo faaaoga ai gagana e lua, le maoae o le malamalama, aemaise o le tomai i le faaaogaina o le gagana e fanau e amata i le aoga ae sa auai i aoga amata oloo faaaoga ai le gagana Samoa. E le gata ina amata fiafia, ae o le faigofie ona faamasani ma isi tamaiti. Ua matauina e faiaoga le vave o le faitautusi faasamoa, aemaise o le faitautusi faaperetania.
E taua tele le atinae o le mafaufau, ma le atinaeina o faalogona. O tatou lava ma o tatou uiga faaalia, e tele ai le aafiaga o le mafaufau ma faalogona o le tamaitiiti. O le toatele e manatu, e le aoga le gagana Samoa pe a amata i le aoga nao le Igilisi. O lona uiga ua le aoga ma le taua la tatou gagana, aganuu ma lo tatou faasinomaga. Ua tatou le amanaia ma faatauaina tatou, ma tele ai foi le afaina o le mafaufau ma faalogona o le tamaitiiti, ma manatu ai, e le taulia ma le taua lou faasinomaga.
O le mafuaaga foi lea o le tele o faafitauli oloo fetaiai ma fanau i aoaoga, ona o lo latou le mautinoa o lo latou faasinomaga, ona aafia ai lea o o latou mafaufau ma o latou faalogona.
O le amanaia o le tamaitiiti atoa, o se vaega sili lea ona taua, aua e le mafai ona fafaga le mafaufau, pe a le lelei faalogona. O se faataitaiga sili ona lelei o le luiina lea e le afioga i le faipule ia Su‘a William Sio o le kapeneta, ina ia faia lana saunoaga muamua i le kapeneta i lana gagana Samoa. O se mitamitaga lea ma se faalaeiau sili mo alo ma fanau lalovaoa a Samoa i Aotearoa, o le faataua o lana gagana, tu ma aganuu, o vaega taua o lona faasinomaga. O lau gagana, o lou tofi mai le Atua, o lou ala i malo.
