Tuumalo Afioga Toleafoa Tautulu Roebeck

Ua faamaonia mai nei le tuumalo ai o le afioga Toleaofa Tautulu Roebeck, o se tasi o tamalii ua leva ona tautua i le Malo i le tele o ona Matagaluega aemaise lava i le Matagaluega o le Tupe a le atunuu lea e tusa ma le tolusefulu tausaga o auauna ai i ona vaega e tele.

E ui ina tele ofisa ma matagaluega a le Malo sa faapea ona tautua ai, ae manatua pea lenei foi tamalii i le atina‘eina o le taaloga o le soka, lea sa avea ai o ia ma Peresetene Aoao o le Asosi Soka a Samoa i le tele o tausaga talu ai.

E tele le sao o Toleaofa i le taumafaiga mai o lenei taaloga i le atunuu, aemaise o le sootaga lea ma le FIFA, o le tino lea o loo faapea ona ogatotonu i ai fesootaiga ma le atina‘eina o le taaloga soka i le lalolagi atoa.

O le afioga Toleafoa o se tasi lea o tamalii sa faaaloalogia i totonu o le Vasa Pasefika i le tino taaloga ona o lona tofiga Peresetene ua loa tausaga o tautua mai ai.

Mo le silafia, sa auina atu i lomiga e lua o le Samoa Times (Setema 13 & 20, 2010) le talaaga atoa o le soifuaga o le Afioga Toleafoa, e pei ona avea ai ma malo faaaloalogia i le itulau o le Saili Malo a le nusipepa.

E mafai ona toe silasila i ai i le tele o vaega eseese o le Malo ua afu  ai le tautua a lenei tamalii o le atunuu i lona foi vaitaimi.

E ui ina sa tele foi vesiga ma faafitauli sa tulai mai i le asosi soka a le atunuu i nisi o tausaga, peitai o le tomai ma le agavaa o le afioga Toleafoa sa foia ai nei faafitauli e aunoa ma le faaono faaleagaina ai o le igoa o le asosi ma le tele o ‘au sa faapea ona resitalaina ma fiafia pea i le atina‘eina o le soka i Samoa. O le a misia lenei tamalii ona o se tasi sa tele lona sao i le atunuu.

O se taitai sa tulai malosi i le faatinoina o ona tiute a o avea ai o ia ma faauluuluga i nisi o matagaluega a le Malo i tausaga ua mavae. O se tagata e fiafia tele e taalo, toe lē faailogaina lava se tasi e faauo i ai.

O ia o soo se paaga i le tele o tagata, aemaise lava i latou e lava lo latou silafia o le afioga Toleafoa.

E lei faamautinoa mai se aso o ona toe sauniga, ma e iai le talitonuga o le a faatumulia lona maliu ona o se tasi sa faapea ona tautua i le Malo i le tele o tausaga.

Tau ina ia faamaise atu le agaga faamafanafana o le Tamā i le lagi, i le faletua ia Taililino Roebeck ma le nofoaalo ona o le motusia o le mafutaga ma le tama pele.