Talu lava ona mae‘a le afā o Evan i le faaiuga o le tausaga ua mavae na tulaga faaletonu lava tele o le otaota ua faaputuputu ma ua opeaopea i vaega o le sami i tua o le maketi i‘a i Savalalo.
Ua alu le masina o fesilisili solo le tatou ofisa i Samoa nei poo ai tonu lava e tatau ona faamamāina ogasami nei aemaise o le faalavelave ai i feoaiga a vaa fagota ae e leai lava se isi na tali mai seia oo lava ina fesiligia le Vaega o Pulega ma Fuafuaga o le Taulaga (PUMA) pe lē o latou e aiaiad lea tulaga peitai o le latou tali e leai.
Ae ina ua toe asia e le nusipepa i le vaiaso lava lenei na maua ai le tali tonu o lea fesili. Na saunoa le sui o le Matagaluega o Faatoaga ma Faigafaiva, Henry Taveuveu o lea ua galulue le aufaigaluega a le Ofisa o Pulega o Uafu mo le faaleleia o lea vaega.
“Na iai lava le popolega i le toatele o i latou e ana vaafagota ona e iai vaega o a latou alia ua faaleagaina ona o le tele o ogalaau aemaise ai le anoanoai o lapisi o loo faaputu uma i le vaega e taula ai,” o le saunoaga lea a Taveuveu.
“E lē gata foi i lena ae o le popolega a lenei foi Matagaluega (Faigafaiva) i le aafia ai lea o le soifuamaloloina o i latou o loo agai atu ma faaaogāina lea maketi i‘a mo faatauga faatasi ai ma le aufaifaiva.” Ua pei lava lea itu o le maketi i‘a o se vaega e teu i ai laau tetele ua tatuu ma faaputu mo le gaosia o laupapa i le tele o laau tetele na tafia mai lologa o le afā ma lafoai ai i lea vaega o le gataifale.
Na mafai foi ona maua le avanoa e saunoa ai le sui o le Pulega o Uafu ma Taulaga ia Pene Toia e tusa ai ma lenei foi mataupu.
“O le talosaga lava na tuuina atu e le Matagaluega o Faigafaiva ma Faatoaga lea ua a‘e ai se tofa i le Alii Pule ma le Pulega foi ina ia matou faia lea galuega mo le lelei lautele o le atunuu,” o le saunoaga lea a Toia.
“O le galuega tele foi lea, auā e kilia uma lava le lapisi o loo opeopea i luga o le sami ma nisi o lapisi o loo magoto ma le tele o ogalaau o loo taatitia luga o vaega e toso ai vaafagota ma faaaogāina e le au faifaiva.”
Na ta‘ua foi e le sui lenei o le SPA o le tasi o faamatalaga na sāua lava i taliga e faapea ua tele ina faaleagaina nisi o vaega o alia fagota a i latou o loo taula o latou vaa i tua o le maketi o i‘a. Ae ina ua fesiligia se tasi o faifaiva mai se tasi o vaafagota, le susuga ia Keli Manuele na ia ta‘ua ai “…e taunuu mai le latou vaa ina ua mae‘a le ‘afa ua leiloa pe o fea o tua o le maketi i‘a o le a taula ai, na matou taumafai lava na nisi o uso e tatoso ese ogalaau ae se‘i faaofi mai le vaa i totonu,” o le saunoaga lea a Manuele.
Ua faamoemoe nei le Pulega o Taulaga ma Uafu e oo atu i le vaiaso fou ua mae‘a ona toe faamamā lea vaega o le taulaga ma faaleleia ai pea auaunaga ma galuega a le Matagaluega o Faigafaiva aemaise ai le puipuia o meatotino a le au faifaiva mai le faaleagaina.
