Ua amata le tausaga 2016 ma ona amataga lelei, auā o le tasi lea manulauti o loo faatāua pea e tagata lautele o le ola soifua maloloina lelei. O le fesili o loo tulai mai i le tele o aso ma tausaga pe aisea ua mafua ai ona vave maliliu isi tagata e lei oo le matua o lo latou soifua i le 70 tausaga e pei ona ta‘ua e le Tusi Paia e tatau ona oo i ai le soifua galue o le tagata.
Ae o le agaga fiafia ma le loto faafetai o le paia ma le mamalu o le atunuu o loo alala ma aumau i le itu i Sasae o Aukilani e aofia ai Mount Wellington, Panmure, Glen Innes, ua mafai ona faatuina se polokalame o le Walking Samoans e faamalosia ai le savavali o tagata uma i lea faaitu auā le soifua maloloina lelei i le tagata.
Ua lua nei vaiaso talu ona faagasolo lenei polokalame matagofie, ma ua vaaia ai le toatele o tamā ma tina matutua ma fanau ua mafai ona faatāuaina lenei faamoemoe. O Aso Lulu o vaiaso taitasi o loo faataunuuina ai lenei polokalame ma o loo galulue faatasi ai tamaalii ma faletua o loo galulue i le Health Star Pacific i Panmure ma nisi o tamalii o loo taitaiina lenei savali le tofa ia Pa‘u Teleiai Edwin Puni ma le tofa ia Sooalo Setu Mua.
O le ta o le iva i taeao o Aso Lulu e amata muamua i le faia o siaki e lē totogia mo tagata lautele, mo le toto maualuga ma le suka, ona amata lea o le savali i le ta o le 10.00.
E itula e faatinoina ai le savali ona sosoo lea ma le fofoina o le tino e ala i masini ua faaaogāina e le ofisa o le Health Star Pacific e le susuga i le fomai ia Dr Aiiloilo Olo Elise Puni. E 30 minute e faatinoina ai lenei fofo, ona see atu lea i le fomai ia Dr Bo Wong e fofo ai le ulu tiga, tua tiga ma le ua tiga faatasi ai ma le siakiina o le mafaufau i ni vaega o loo mamafa i le mafaufau.
Ua lua nei vaiaso talu ona faagasolo lenei polokalame ae ua maitauina le toatele o tagata matutua ma tupulaga talavou ua lolofi atu e faatāua lenei avanoa. Ae na saunoa le tofa ia Teleiai Pa‘u Edwin Puni ma le tofa ia Sooalo Setu Mua, o loo taimua i lenei polokalame, ua iai le Walking Samoans i le itu i Sisifo o Aukilani, ua iai foi le ausavavali i Saute i Manukau faapea ma Magele, ae o lea ua faavaeina le ausavavali mo le itu i Sasae ina ia maua uma e tagata lautele le soifua maloloina lelei.
Auā a lelei le tausiaina o le ola o le tagata e faigata foi ona maua i ma‘i o lenei soifuaga. O le fiafiaga foi lea ia i laua, ona ua tuu mai le avanoa e le Health Star Pacific latou te galulue faatasi ai mo le manuia lautele o tagata Pasefika.
