Na mae‘a le taamilosaga lona valu ua amata ona iai le manatu ua matuā fasi gatā lava le Amerika ia Jason Bergman ae o taamilosaga nei na matuā iloga ai le tigaina o le alii papalagi ona ua ila le tino i le faaauau ona osofai e Lupesoliai Laaulialemalietoa Joseph Parker.
O le taamilosaga muamua lava o le taaloga lea na faapea ua tulai sa‘o mai lava se tagata e mafai ona faatoilaloina lenei alo o le atunuu ua logologoā ana taumafaiga i lenei vaitaimi i le agai ai i luga o le lisi o tagata aupito i lelei i fusuaga faapolofesa o le lalolagi.
Na manino le lue lelei o le auvae o Lupesoliai Laauli i le amataga o le taamilosaga muamua ma na faapea atonu o le a ono afaina ai taumafaiga a le alo o le atunuu mai i Niu SIla. Peitai na gata ai lava iina se lu‘i mai i le alii Amerika o Bergman ae faagasolo ane loa ona osofai e Lupesoliai Laauli.
E umi le taaloga lenei pe a fuafua i isi paga a Lupesoliai Laauli ae faapea foi ia Bergman lea e faapea mai faamatalaga e lē sili atu lava i le taamilosaga lona ono ana taumafaiga i tausaga ua tuanai. Mo Parker, o lea ua manumalo i ana fusuaga uma e 18 ma ua saga siitia ai lava le taumafaiga ina ia ausia le lu‘i tele o le fusi o le lalolagi pe afai e alualu pea i luma ana taumafaiga nei.
E ui i le leva o le po, na manino lava le tumau o le tapuaiga e le gata i le tumutumu o le tusa ma le to‘a 3,000 na auai atu i lea fetauiga i le malae taalo i Tuanaimato, ae faapea foi le faitau afe ma afe o tagata na maimoaina le fusuaga faapolofesa mai i aiga aemaise foi i itu e fia o le lalolagi. O le faafetai a le atunuu ona ua iloga le lava tapena o Lupesoliai Laauli Joseph Parker ma ua iloa ai foi le telē o le avanoa e ono maua e lenei alo o le atunuu e vave ai ona taunuu ona moomooga e avea ma siamupini o le lalolagi i le fusuaga faapolofesa.
E pei lava ona maimoaina e le atunuu o le vaiaso atoa lava lea na unai ai faalauiloa auā le a‘oina o le tapuaiga a Samoa i lenei tamafanau ma na matuā agai ane le atunuu e molimauina sauniuniga a lea alii ma na laitiiti lava se taimi na mafai ai ona maua se avanoa ma le alii agavale ia Jason Bergman ona o le itu tasi o le tapuaiga i le alo o le atunuu.
E ui o lea na faaalia foi le faafetai a Bergman ona o le talilelei o ia ma na agai ane lava nisi o le atunuu e faaali le faafetai ma le lagolagoina o le ioe foi o lea alii e fetaui i Samoa nei ma se tagata ua manino e matuā malosi i ai le tapuaiga a le atunuu.
O lea ua toe foi i Amerika Bergman ma e faapena foi Lupesoliai Laauli ma o se taimi ua manino le mitamita ai o le atunuu ona ua mafai ona molimauina lenei fusuaga i Samoa nei.
Ua iai foi le fuafuaga lea ua toe faalauiloa i le toe foi mai o lenei alii mo se isi fusuaga faitaulia faapea i le lumanai.
Ma o le faafetai lea a le alii Palemia le minisita foi lea o le atinae o tagata tafafao maimoa mai i fafo, ona o le aogā o lenei fusuaga i lenei atinae i le toatele o tagata na mafai ona agai mai e maimoaina taumafaiga a lenei alo o le atunuu i totonu lava o le atunuu ae e lē gata i lea o le faalauiloa atu ai o Samoa i atunuu i fafo na agai i ai faasalalauga o lenei taaloga faitaulia.
Ua faapena foi ona molimauina ai ma isi alo o Samoa i paga na muamua atu i le paga autu ma manino ai le malosi pea o le taaloga o faipelega i totonu o Samoa.
