Osiga feagaiga a George ma Senetima Naoupu i le faaipoipoga

E lētioa foi tausa‘afi le Tusi Paia ma faapea ane, E leai se mea sili i lo lenei pe a ou faalogo o savavali la‘u fanau i le upu moni.

O moomooga e laualuga i soo se matua Kerisiano se tasi o le fanau ae oo i lenei tulaga o le faaipoipo, auā ua lalago faatasi manatu ina ua tuufaatasia le alii o George Naoupu ma lana manamea o Senetima Fanene i le faaipoipoga lea sa faataunuuina i le Clearwater Resort i Kalaiesetete i le aso 12 Mati.

O George o le alo o Fata Alaese Naoupu ma Kerena mai Afega ma Tuanai, ma le tamaitai faaipoipo o Senetima, o le alo o le tina ia Toeafiafi Taiti Fanene mai Vaie‘e ma Moataa.

O le sauniga lotu ma le faapaiaina o le ulugalii fou sa taitaia e le susuga i le tausi matagaluega, Rev Ale Palelei. Sa faatasia ai foi susuga i faifeau malolo, Lasalo Tuilagi ma Elisara Elisara o le matagaluega Kalaiesetete.

E lē gata i lea o le mamalu o le valaaulia aemaise le paia o aiga ga lua, ma uo sa malaga mai Samoa, ma isi atunuu mamao ma soo se tulimanu o NiuSila.

O le alii faaipoipo o George sa taalo i lana konekarate lakapi i Iapani, i le mae‘a ai ona taalo mo le autele a Hawkes Bay.

O le taimi nei ua maua lana konekarate fou i le kalapu lakapi i Ireland, ae o Senetima e aumau o ia i Oamaru i le mae‘a ai o ana aoga ma galue ai.

O le laina o aumeamamae a George sa faatasi ai alii taalo aulakapi Crusaders, faapea alo o le atunuu mai Iapani aemaise le auvalaaulia sa faatumulia i le mamalu o Samoa aemaise o uo palagi molimauina lenei aso tāua e ui ina afatia lenei aai i mafatiaga o le mafui‘e.

Mae‘a le sauniga, sa tauaaoina le faaafe a aiga ga lua i totonu lava o le fale tele ma le matagofie na faia ai le faamoemoe, a o toesea le ulugalii fou mo puega ata, e oo ane i le taimi o le taumafataga ua faamalieina le auvalaaulia i le pasi ane o soo se ituaiga taumafa māmā faapea nai vai taumafa mo aso fiafia faapenei.

O le tuagane o le tamaitai faaipoipo, Aliisili Fanene sa fai ma fofoga o le aso, ae o le fetalaiga Auimatagi Saoloto o Malie, sa ia muai fetalai mo le faafeiloaia o le paia o le aufaigaluega aemaise le auvalaaulia ona alo atu lea i le taumafataga felanulanuai.

O le tina o Toeafiafi Taiti faapea le fetalaiga Fata Alaese sa saunia molimau matagofie mo le fanau ua tuufaatasia. Manaia foi sauniuniga o faafiafiaga eseese na tapenaina e le aiga o le tama faaipoipo ma ua sisiva ai tagata uma.

E tusa ai ma aga i fanua ma tu masani, sa alo ane le paia o aiga ga lua mo faaaloaloga maualuluga, sa faatautaia lea e le tofa Matauitaua Lutu Taiti ma ua fata luga, fata lalo i le maamaau ma le milosia, ua talisapaia faatuaeleele le faaaloalo.

O le fetalaiga Manumailagi Fetu sa taumafaia se upu e tali fuaitau atu ai e fai ma sui o le valaaulia.

Na tatalo faaiu le faifeau malolo o Lasalo Tuilagi e tapunia aloaia ai le faamoemoe, faataape le fuamanusina ae nonofo pea le toatele e faaauauina le valaaulia faaaloalo i totonu lava o le Clearwater Resort seia paia le vaeluaga o le po.

E faamanuia atu ai le tatou nusipepa nei o le Samoa Times mo le ulugalii fou, George ma Senetima Naoupu, Bon Voyage!