O le aso lenei e sili ona tāua ma faagalo gata, i soifuaga o le alii o Robert Iuko Tuioti-Mariner, ma lana manamea le tamaitai o Singa Taulagi Tofoiipupu Elizabeth Livett. Sa la soifua mai i ni tupuaga eseese, ni talaaga eseese, ma ni siomaga eseese foi, ae ua tuufaatasia nei i le sakalameta poo le sauniga paia o le faaipoipoga.
Ona lē toe ta‘ua ai lea o laua o le tama ma le teine, le alii ma le tamaitai, ae ua fusia nei i le fusi e tasi, o le tane ma le āva faaipoipo.
Na matauina foliga o le faamalieina o le ulugalii fou ina ua tau lau o lo la faamoemoe ma moomooga sa fauao faupo. Ae sili ai le molimauina o foliga fiafia o nai mātua ma aiga i lea aso, a o faatino sauniuniga ma tapenapenaga uma, auā le faataunuuina o le valevale alofa o mātua i fanau.
O le susuga i le Toeaina Faatonu ia Popo Su‘a o le EFKS Ketesemane i Porirua sa taitaia ma faapaiaina le ulugalii fou.
Sina talaaga puupuu:
Le tamaitai faaipoipo: Singa Taulagi Tofoiipupu Elizabeth Livett.
Le alii faaipoipo: Robert Iuko Tuioti-Mariner.
O mātua o le tamaitai faaipoipo, o Tusiga Livett mai Faleaseela i Lefaga i Samoa ma William-Thomas Livett mai Egelani.
O mātua o le alii faaipoipo, o Ieu Tuioti ma Celia Koni.
Avea ai foi lenei avanoa e momoli atu ai le agaga faafetai a le ulugalii faaipoipo i le au valaaulia, o uo ma aiga i lo outou alofa foai ua matagofie ai lo maua aso fiafia. O la a le tusi, ‘E sili le manuia o le foai i lo le na te talia’. Faafetai, Singa ma Robert Tuioti-Mariner.
