E ui lava ina lē atoa le faitau ma lē maua le uluai fiafia i totonu o le aiga e pei ona masani ai ona o mafutaga motusia, peitai, o lā le faisalamo o Tavita, e faaopoopoina pea le malosi o le tagata e faalagolago lona soifua i le Atua. Ua tausunu‘i ao o le lagi, o le alofa lea o le Tolu Tasi Paia, ua vaelupe maua ai le fesilafaiga fiafia i le lagi e mamā ma le soifua manuia, i le lato i le ea ma le lato i le tai i aiga na lua auā le faamoemoe sa lupe ma taupoina.
O le aso na fuafua faatasi i manatu ma finagalo autasi e alo ma fanau, ina ia taunuu manuia le faamanatuina o le 80 tausaga o le tamā matua ia Taituuga Lepau Ioelu poo le fetalaiga i le Manu o le Tuasivi. E faigata leaga o le toeaina e fagota i tai e lua, o le toeaina foi e afio mai i le itumalo e pogai mai ai le igoa o le ‘au a si o tatou atunuu le “Manu Samoa” (Sapunaoa Falealili).
Na soifua mai o ia i le aso 14 o Mati i le tausaga e 1941, peitai na autasi finagalo e faamanatuina i le Aso Toonai, 19 o Mati. Na motusia le mafutaga a le fetalaiga ia Taituuga Lepau ma si ona faletua ia Lotoa Lepau e ala i le maliu ma le oti i le 2007. Mai lena taimi e oo mai i le taimi nei, o loo avanoa pea le toeaina, o se saunoaga lea a se tasi o le nofoaalo i lana molimau e saafi ai pea ma faafiafia si o latou tamā.
Saunoa le susuga i le faafeagaiga ia Pastor Malie Ioelu, (lupe faalele a le aiga) o si o latou tamā o se tagata e fiafia tele e talatalanoa i tupulaga talavou a si o latou nuu. E tele ina saili e le tupulaga le toeaina ona o le mālie o ana suāga.
O polokalame o le aso soifua o le tamā na muai momoli laau i Fogaa e le taitai o le ekalesia na malaga mai Aukilani NZ, le susuga ia Ps Tanu Allen o le Ekalesia New Life Christian Fellowship.
O augatupulaga na tupuga mai lenei tama matuā e toa 3. Sa tulai le A‘oa‘o fesoasoani le susuga ia Tamaletoa Romeo Lepau o lē sa fai ma fofoga o le aso auā e faigata le paia i le auvalaaulia aemaise Manusina o le tala lelei sa auai. Na fetaui fola auā na fai ma sui o le auvalaaulia le tofa ia Nanai Afa Nanai e molimolia se agaga faafetai i le maualuga o faaaloaloga.
Na tofusia ma faamalieina ē na potopoto i le felanulanuai o taumafa eseese na tapenaina e le afioga i le alii pule o le WKK SUPER SUPPER, Pauli Ituau Atipopo ma le faletua ia Line Wongkee, o se faleaiga ua loa foi le tautua i Brisbane.
O faamanuiaga mo le aso soifua o le fetalaiga ia Taituuga mai le paia o le ekalesia, susuga i le faafeagaiga ia Ps Malie ma le faletua ma le aiga, faapea le nofoaalo ma fanau ma fanau a fanau. Alofaaga foi mai le tofa a Taefu Patea & Tina ma le fanau, tina ia Tumama, Maaelopa Fa‘i Tamaletoa ma le aiga ma le mamalu i aiga ma uo.
