O le molimau a le tina ia Niuula Faleupolu Toala, e faapea, na fiu nai ona mātuafai ia Leaumoana ma Faataga o Fatuvalu i Safune e tauanau ia e alu e faaauau lana aoga ae o ia lava ua musu ona o le vaai alofa i nai ona mātua i le faigata ua iai le latou aiga.
O le tina lenei na soifua mai i Malie i le aiga o lona tina, ina ua mae’a mai le galuega faamisionare a nai ona mātua ia Rev Esau Leaumoana ma le faletua ia Ela Leaumoana i Papua Niu Kini ma Kiripati sa galulue ai i le sefulu tausaga. O le malologa lea na faatalitali ai le susuga i le faafeagaiga ia Rev Esau Leaumoana ma Ela mo se isi valaau mai a le ofisa tutotonu o le ekalesia EFKS poo fea se isi nuu e toe faaauau ai le laua galuega.
O Malie o le nuu lea na soifua mai ai le tina, ae ina ua toe tofia ona mātua e le ekalesia EFKS e faifeau i Samalaeulu i Savaii na mananao ai loa ona mātua e ave ia i le tuafafine o lona tamā i Fatuvalu i Safune e nofo ai ma saili ai sana aoga, ma o lea sa faatea ai loa ia e ona mātuafai lenei i le valu o ona tausaga.
Soifuaga o le tina i totonu o lona aiga fou i Fatuvalu
Na gata aoga a Niuula i le aoga tulagalua a Fatuvalu ona nofo loa lea i le fale e fesoasoani i nai ona mātua i le faiga o le fatuaiga tausi pe a ma le sefululua na o ona tausaga. Na fiu ona mātua e toe tauanau e alu e faauma lana aoga ma saili sana galuega auā lona lumanai manuia, ae o ia lava ua musu ona o le vaai alofa i ona mātua.
O lona tamā ia Leaumoana sa usu i le taeao i le maumaga a’o lona tina e nofo lava i le fale e fai ana galuega faaletina. E ausage le latou aiga sa iai a’o fanua a lona aiga e leai se aiga o le latou nuu e tutusa o latou fanua ma fanua a lona aiga le tetelē. Sa fiafia i soo se taaloga i totonu o le nuu, aemaise ai o lona fiafia tele lea i le Aoga Aso Sa i na vaitaimi. E lē fiafia i isi aoga ae pei o le Aoga Aso Sa ma aoga faitau tusi i le po sa fiafia tele iai lona olaga ae sa leai foi se mea o le Tusi Paia e lei oo iai lana a’oa’oga i lea taimi.
E tele ina alu i uta e fai le toga koko e fesoasoani ai i ona mātua auā o latou le isi aiga sa telē lea faatoaga, faatasi ai ma le nofo i le fale e lalaga papa laufala, fala lilii ma ietoga. Sa iai taimi e alu ai suesue ana galuega i isi aiga e fai foi a latou faatoaga koko faatau, o aiga ia ua tu lelei, ona alu lea velevele vao ai ona maua mai lea o lana fa seleni i le aso e tasi ae a atoa le vaiaso ua maua mai le sefulu seleni poo le pauni.
O tupe nei e aumai ona ave lea i ona mātua e fesoasoani i nisi mea e fai o le latou aiga, e tau lē tele se tupe e alu i faatauga o meaai i faleoloa i la aso, auā sa lelei faatoaga e maua ai meaai aemaise foi o le tele o taimi e maua ai i’a pe a alu lona tamā e fagota. A maua e le aiga le pauni i ia aso e fiu lena aiga e faaaogā ae ala lava ona vave ona uma le faaaogāina o nei tupe pe a fai ni faalavelave.
Toe foi i ona Mātua moni
O le 17 o tausaga o le tina ia Niuula na toe foi ai i ona mātua moni ia Rev Esau Leaumoana ma lona tina ia Ela i Apia i Leone ina ua malolo manumalo mai ona mātua ma le galuega faafaifeau. O iina na toe faaauau ai lana galuega o le tausi matua ma fesoasoani i lona aiga.
E ui lava la i le toe foi mai i Apia i ona mātua moni ae sa lē mafai ona aveesea ai lona mafaufau alofa i ona mātuafai i Savaii sa faafaileleina lona olaga ma a’oa’oina lona olaga i feau ma tiute i totonu o le aiga. Ua nofo nei i Apia, na’o le fifilemu e leai ni feau e faia, se’i vagana ua alu se faiga fafie i lalo o le aualalaupapa i Vaisigano, a’o Savaii e ala a’e i le taeao ua iai lona ieie ma lona ofu faigaluega ma toe usu foi i le maumaga.
Ua alua’i alua’i lona olaga ua fai lona aiga (toalua) ma ua iai foi lana fanau, ua iai foi le suiga o le olaga fou ae e lei tuua ai lava lona finau e saili tupe auā le tausiga o mātua faapea le faaaoogaina o lana fanau. O lona toalua sa faigaluega i le ofisa o le vai i le vaega sa totogi ai pili o vai, a’o lana matafaiaoi o le faapa’u lea o koko ma tunu ai le tipoti koko ona o lea ma lana fanau e faatau savali i le uafu i Matautu ma maua mai ai isi seleni e fesoasoani i le aiga. Na malosi foi le la galulue i le ekalesia EFKS i totonu o le nuu auā sa galulue ai i le la tofi tiakono. Ua faamanuia le Atua i le fanau e ala i galuega ua latou maua ae o nisi o le fanau ua maua avanoa e malaga mai ai i Niu Sila e sailiili manuia auā lava mātua ma aiga, ma o le avanoa lea sa maua ai loa e malaga mai ai ma laua i totonu o lenei atunuu ma nonofo faatasi ai ma le fanau seia oo mai lava i le taimi nei. Ua iai uma iinei le fanau a le loomatua ma le toeaina ae se’i vagana ai le la tama teine e toatasi o loo nofo mai nei i le aiga i Samoa.
O le aoauli o le Aso Toonai ua mavae na tumutumu ai le hall a le ekalesia Te Atatu EFKS i aiga uo ma ē msani i le faamanatuina o le 80 tausaga o le soifua o le tina ia Niuula Faleupolu Toala. O le viiga ma le faafetai i le Atua ua alaga e lana fanau i lea taeao i totonu o le malumalu o le ekalesia Te Atatu EFKS e pei ona avea ai le susuga i le toeaina ia Rev Lucky Slade ma ositaulaga e momolia lapalapa o malo i le Tapaau Sili i le lagi ona o nei tausaga e tele ua foai i le soifua tulu’i o le tina.
O lupe sa vao eseese a’o lenei ua fuifui faatasi i le alofa o le Atua ua faataunuuina ma le manuia le faamoemoe. O le susuga ia Toala Filo na saunoa e faaafe le paia o le aufaigaluega a le Atua ma le auvalaaulia ina ua mae’a le sauniga, a’o le susuga ia Leaumoana Toala Tamasoalii Kerisoma Toala sa fai ma fofoga o le aso, o ia foi sa gafa ma faaaloaloga mulimuli faapea le momoliina o le agaga o le faafetai i le paia o le aufaigaluega a le Atua ma le auvalaaulia sa afifio atu ma molimauina le aso fiafia o le tina ia Niuula Faleupolu Toala.
O le keke o le aso soifua o le tina na saunia lea e fanau o fanau o lana fanau, o le latou sailiga seleni sa fai na faaputuputu lea auā le latou meaaalofa, faatasi ai ma latou tapenapena i le lanu sa fai agai iai le teuga o le fale i le lanu moli ma le uliuli faapea a latou togiga o le faailoga lea o le lanu e fiafia le loomatua e fai ai ona laei, o le lanu o lona fale faapea ma ana laau totō.
O loo faaauau pea le galue o le tina i lona tofi tiakono i totonu o le ekalesia Te Atatu EFKS i lalo o le taitaiga a le susuga i le toeaina ia Rev Lucky Slade.
