Malaga aoga Agape Bible College mo Isaraelu

Malaga aoga Agape Bible College mo Isaraelu

O le aoauli o le Aso Tofi o le vaiaso ua mavae, na tuua ai e le aumalaga e 30 a le aoga Tusi Paia a le Ia Mamalama Agape Bible College Aukilani Niu Sila nei ae tuuvaa atu mo Isaraelu.

O lea aumalaga e toatele o loo aofia ai faiaoga e toalua le susuga ia Pastor Chalie Reed ma lona faletua faapea le susuga i le faiaoga ia Pastor Tilaulelei Kirifi, faatasi ai ma nisi o sui mai i Samoa e toalua faapea se tasi o susuga i le faafeagaiga ia Ionatana ma lona faletua ma le sui e toatasi mai Ausetalia.

O le mae’a ai o faauuga a le aoga Tusi Paia i tausaga taitasi ona faasauni foi lea ma le malaga a tamaiti aoga e o e matamata ma molimauina vaega o le nuu paia o le Atua o loo agai iai a’oa’oga i totonu o le aoga. E tatala le avanoa i soo se tasi e fia auai i lenei aumalaga, ae o tapenaga uma lava e tapena lava e le tagata aoga ma le faiaoga lona pasese ma mea uma e totogi ai le nonofo i faletalimalo ma mea uma o loo faaaogāina i le malaga.

E iai le aumalaga mai Ausetalia e 20 mai nisi foi lala o le aoga a le Ia Malamalama Agape Bible College o loo malaga faatasi ma le aumalaga mai i Aukilani ona 50 faatasi ai lea o le faigamalaga.

O le toatele o le malaga i Aukilani o tagata o le latou taimi muamua lea ua malaga ai, ae na’o le toalima i latou sa malaga muamua o lea ua toe maua le avanoa e asia ai Isaraelu.

O le faamoemoe maualuga o le aoga i nei malaga ina ia iloa e le au aooga aemaise o faifeau o loo malaga ai, le moni ma le faamaoni o mea o loo talanoa mai ai le Tusi Paia ma le vaai tino iai i nei nofoaga ma mea sa tutupu ai vavega a Iesu.

O nisi o faifeau, o loo ave faatasi galuega a le Atua i le taimi e tasi, e pei o le faifeau ae o loo mafai foi ona avea ma faiaoga i totonu o le aoga.

O le tāua la o nei avanoa o loo mafai ona latou laugaina le upu a le Atua i totonu o ekalesia ma le a’oa’oina o fanau aoga i le Tusi Paia ae o lea ua latou mautinoa moni vaega taitasi ia i totonu o Isaraelu.

O le ala foi lea o le alu tonu o le malaga i le taimi e uma ai le faauuga ina ia aua ne’i mamao mafaufau o le au aooga i mea sa a’oa’oina ai ma mea ia o le a latou o e vaai ma pa’i iai.

O tapenaga o nei malaga o loo faailoa ai foi le fai vavega o le Atua i nei tagata, auā o loo molimau i latou e saili lava mea uma i le faatuatua ma le talitonu i le Atua faivavega, e fai si taugata o tupe e totogi ai pasese ma totogi ai mea e nonofo ai, ae e leai se mea e faigata i le Atua e saunia lava e ia mea uma mo lana fanau.

O nisi e sosoo lava le tailua tausaga ma le taitolu tausaga o o i nei malaga, ae e molimau i latou e lē alu fua le tupe o loo totogi ai nei mea uma, auā e foi mai le malaga ma le manuia o latou loto faatasi ai ma le manuia o latou aiga.

O le lima ai nei o tausaga talu ona faatinoina pea e le aoga Tusi Paia o le Ia Malamalama Agape Bible College nei malaga, ma le faamoemoe maualuga e faaauau pea i tausaga taitasi lenei faamoemoe auā ua lē gata i le manuia ai o le au aooga i totonu o le aoga Tusi Paia ae o loo manuaia ai foi nisi o ekalesia.