Sauni se tamaitai Samoa e tauva i le tofi Peresetene o le Iunaite Setete o Amerika (USA)

O le tamaitai o Tulsi Gabbard, e 37 tausaga le matua o lona soifua, mai Amerika Samoa, ua iai lona manatu o le a tauva i le palota o loo loma i le 2020, i le tofiga o le Peresetene o le malo tele o Amerika.
O lea finagalo o le tamaitai o Gabbard, na faalauiloa faalauaitele lea i se konefesi na usuia i Los Angeles, lona naunau lea e tauva mo le tofi Peresetene.
O le feagai ai o lea konefesi ma ana mataupu faagasolo, na tulai ai i luga lenei tamaitai ma faalauiloa lona manao e pei ona ia faaalia ai.
O le taimi na tuuina atu ai le avanoa mo lana lauga, na afea ai i sona finagalo lona faanaunautaiga, e tauva mo le tofi Peresetene o le malo tele, i le palota o le a sosoo ai. E mae’a lelei le saunoaga a le tamaitai, e lei iai lava se tasi na tulai atu e teena lona manao e pei ona faaalia.
O lenei alo o le atunuu, o ia o se sui na manumalo mai i le vaega o le Democratic Congress i le nofoa o le 2nd Congressional District o Hawaii, sa avea o ia ma sui mai lea vaega o le itumalo talu mai le 2013.
O le tamaitai o Gabbard, na fanau o ia i Loaloa Amerika Samoa i le 1981. O lona tamā o Mike Gabbard o le Samoa ma lona tina Carol Porter Gabbard mai Indiana Amerika. O loo tapuai i le ekalesia Hindu, o loo tapuai ai lona tina.
O le lua o ona tausaga na malaga ai lona aiga ma aumau i Hawaii. Na tupu a’e o ia i totonu o se aiga e faatāuaina tu ma aganuu o tupuaga o lona tamā o le Samoa, ma lona tina e iai lona pito Initia ma Europa. Sa ola a’e i le ekalesia Katoliko, peitai na tapuai i le Hindu ina ua sefuluvalu ona tausaga, o le faatuatuaga lea sa tapuai ai lona tina. O ia o se tagata Samoa muamua ua avea ma sui o le fono a le U.S. ma ua maitauina le tele o lona agavaa i mataupu e mafai ai ona faafoe malo tetele e pei o le Malo tele o Amerika.
Faailoa e le sui o le palemene, ia Bernie Sanders e faapea, e tele ni agavaa o lenei tamaitai o loo faaalia i faiga faavae i fafo atu o le malo tele, ma o ia faiga e sili atu le naunau o lenei tamaitai ia lelei le soifua o tagata, nai lo ia. O se tasi o tulaga aloaia ma le maualuga na feagai ma lenei alo o le atunuu, o le mafai lea ona faataututu ma nisi o loia maualuluga i Amerika, e ala i le fausia o tulafono, lea na tulai mai ai se feeseeseaiga ma isi loia e fausia tulafono mo le manuia lautele o tagata.
O se taimi muamua lea o le a tauva ai se sui Samoa i lenei tofiga, ma o se tasi lea o laasaga maualuga, o le a faapea ona ausia e tagata Samoa i atunuu i fafo o le lalolagi.
E ui e lei aloaia ona faalauiloa lona tauva ai i le tofi peresetene, ae ua mautu lana vaega o le a latou galulue faatasi, ua amata foi ona agai lana vaega e saili fesoasoani tau tupe mo le faamoemoe o le tamaitai o Tulsi.
I lipoti na ta’ua ai o le Setete o Iowa o loo unaia malosi le tamaitai e tauva mo le tofi Peresetene. O le 2020 le isi faigapalota tele a Amerika, afai ae tauva Tulsi ma manumalo, o le a avea o ia ma uluai tamaitai e tauaveina le tofi peresetene o Amerika, e lē gata i lea, o ia foi o le tamaitai aupito i talavou i le tofiga.