O le talitonuga o le susuga ia Savea Misa Masame Taipi Lolesio ma le latou laulau o le mafutaga a Falefa i Aukilani, o le tele lava o lima e māmā ai se avega. Ma o le galulue faatasi i le loto e tasi e saunia ai e le Atua le mamoe e osi ai lana taulaga.
O le malumalu tapuai a le ekalesia Katoliko i Falefa sa faaleagaina e matagi i le tele o tausaga ua mavae, O le Finagalo Paia o Iesu. Ua iai le finagalo o le afioga ia Patele Petelo Ume o le tamā pule lea o le matagaluega a Falefa ma le latou laulau a fono, ua toe fia faaleleia le mauga o le Atua, ma o le ala lea na faatalauula mai loa i alo ma tamafanau o Falefa o loo aumau i atunuu i fafo auā se fesoasoani i le toe faaleleia atoa o le malumalu.
Ua taunuu le tusi ma ua talia foi e le mafutaga a Falefa i Aukilani lea sāvali, ma o le ala lea ua tulai ai tamā ma tina matutua faapea alo ma fanau o Falefa o loo auai i totonu o le mafutaga ma faatino loa le faamoemoe e pei ona iai le latou sailiga seleni i le vaiaso ua mavae. E 16 aiga o loo auai i totonu o le mafutaga sa faataunuuina le sailiga seleni ae sa maua foi fesoasoani i nisi o alo ma tamafanau o Falefa o loo iai o latou aiga i Laulii ma Falelatai, faatasi ai ma aiga i Faleapuna sa tauaao atu foi a latou meaalofa auā le faamoemoe o le mafutaga.
E $30,600.00 le tupe sa maua i le aao mafola o le mafutaga ma aiga sa fesoasoani atu, ma ua iai le lagona faafetai o le mafutaga a Falefa i le Atua ona o lenei seleni ua maua auā le faaleleia o lona malumalu o loo tapuai ai lana fanau. Ua taoto nei le seleni a le mafutaga i totonu o le faletupe, ma le faamoemoe e iai le isi sailiga seleni a le mafutaga o loo mulimuli mai e faalava ai se tupe auā le galuega i Samoa. O loo iai le moemitiga a le mafutaga i Aukilani ia latou ausia se selau afe tala Samoa, ma o loo tumau lo latou faatuatua i le Atua e oo atu i lea aso ua toe iai foi isi mamoe ua aumai e le Atua e osi ai lana taulaga. Ma o loo loto tetele lava le mafutaga e galulue mo le Atua, auā fai mai le Tusi e lē o se mea faaleaogā lo tatou tautiga i le Atua ma lana galuega.
Ua amata faatino le galuega o le malumalu i le taimi nei, ae o loo galulue tamafanau o Falefa i atunuu i fafo e saili seleni auā le galuega.
O loo tutū faatasi le mafutaga i Sini, o Melepone, Brisbane, Ueligitone ma Aukilani i lenei galuega auā e lē gata i le faaleleia o le malumalu tapuai, ae o loo iai foi le finagalo o le afioga i le Akiepikopo ia fai se maa faamanatu e faamanatu ai le selau tausaga talu ona iai le malumalu tapuai o le ekalesia Katoliko i totonu o Falefa.
O le lotu ua silia ma le selau tausaga talu ona faavae mai, ae o lona malumalu tapuai e atoa ia Iuni i le tausaga fou le selau tausaga talu ona iai. O sailiga seleni a tamafanau a Falefa i atunuu i fafo o loo taumafai e faatinoina ai le toe faaleleia o le malumalu tapuai, o le faamanatuina o le selau tausaga o le malumalu faatasi ai ma le maa faamanatu. O le malumalu i Falefa o loo tapuvaetasi uma i ai mea e fai a le matagaluega a Lufilufi, Faleapuna ma Falefa.
E fa selau afe o loo vaavaai i ai le ekalesia e faatinoina ai nei mea uma, ma o loo galulue faatasi tama fanau o Falefa o loo iai i atunuu i fafo ma Samoa ia tini lau o le faamoemoe auā le viiga o le Atua.
Laulau a fono o le mafutaga,
Peresetene – Muagututi’a Toma Tovia Visesio
Sui Peresetene – Nuualiitia Maeli Nuualiitia
Failautusi – Malia Tiumalu
Teutupe – Savea Misa Masame Taipi Lolesio
