Pelesetene o le Sosaiete o Tausi Soifua a Samoa, Solialofi Papalii

“O le lagona o le maasiasi ona faato’ā tupu mai lava lea o se faaletonu faapea, auā ua lē siaki lelei vaega e tapena mo tui o tamaiti, o lona uiga o luga o le faatamala”. O se vaega lea o le finagalo o le Pelesetene o le Sosaiete o Tausi Soifua a Samoa le Nurses Association le faletua o Solialofi Papalii, ina ua afea lona ofisa mo se talanoaga e tusa o le faaiuga ua nofosala ai i le falepuipui tausi soifua o Luse Tauvale ma Leutogi Te’o ona o le sese o le vailaau na sui ai le tuipuipui o le MMR na maliliu ai pepe e toalua. Na faamatala Solialofi o ia na faate’ia ina ua lau le faaiuga ua falepuipui tausi soifua aemaise o lona te’i ona e lei auai i le aso na lau ai le faaiuga o Luse ma Leutogi ona sa faataotolia i gasegase o le tino. “Ua ou alofa lava i nai teine ina ua ou vaai atu i le TV ua sau ai le tala o le faamasinoga”.

O le faato’ā silafia foi lea e le Pelesetene o le tala atoa o le mea na tupu ona sa le mafai ona faailoaina atu i le sosaiete ona sa faasa talu ai o loo faia suesuega ma faatali foi le taunuuga o le faamasinoga. “Ou te lē iloa pe faapefea ona sese le fagu lea i le vaega e teu ai tuipuipui o tamaiti, ae e tutusa lelei lava ma fagu o iai le vai e sui ai le tui o le MMR”. Na faaalia foi e Solialofi o le sese o le fagu o le vai moe i le falema’i i Safotu e lē tatau ona tupu, aua ua na’o le falema’i autu i Savaii o loo i Tuasivi ma le falema’i autū i Motootua i Upolu e maua ai fagu ia e faaaogā mo togafitiga pe a faia ni taotoga poo nisi togafitiga e manaomia ai le vai moe. Peitai o le falema’i faaitumalo i Safotu e lē faia ai ni togafitiga e faaaogā ai le vai moe.

“O le a’oa’iga le faalavelave na tupu ma aafia ai ola o le fanau, ma ua siaki uma lava vaega e faia ai tui o tamaiti ma e faapena foi i isi auaunaga a tausi soifua ma foma’i”, o le finagalo lea o le Pelesetene. “Ou te toe avatu ai lava le faamaulaloga i matua ma aiga o nai fanau na maliliu, ae ua silafia e tausi soifua o le latou iuga lava o le falepuipui pe a lē mataalia ma silasila toto’a i vaega uma e faatino ai le galuega ma e lē tatau ona toe tupu mai se faatamala faapea”. O loo tapena le Pelesetene ma ni sui o le sosaiete e malaga e asi tausi soifua ua nofosala i le falepuipui. 

Na faaalia e Solialofi o le tasi o tausi soifua na faamavae lava ma le galuega e lē toe fia galue ona o le mea na tupu. Sa faamavae a’o lei mae’a le faamasinoga ua faasalaina ai. O Luse ma Leutogi e pei ona faailoa e le Pelesetene ua faaleaogāina lo la tomai faatausi soifua ae e mafai ona toe iloilo pe a tuanai ni tausaga aemaise o loo tuli o la faasalaga ta’i lima tausaga mo le moliaga o le fasioti tagata pa’ivalea ae o Luse ua faaopoopo le ono masina i lana lima tausaga ona o le moliaga o le taumafai e natia le faia o le amiotonu e faasino i le fagu o le vai moe na ia ave ma nanā i lo latou aiga, ae na faato’ā faailoa ina ua tuanai le lua vaiaso talu ona maliliu pepe o Lana Samuelu o Sasina ma Lameko Sui o Safotu.