O le feteenaiga sa tulai mai i le va o le Konesula ma le Fono Faufautua a Samoa e pei ona lipotia e le Samoa Times i lana lomiga o le aso 17 Me 2016, na fesiligia ai se faamaninoga o fono e lua e pei ona agina i le saunoaga a le Konesula le afioga ia Faolotoi Reupena Pogi i le aso na feiloai ai ma le Fono Faufautua a Samoa i Aukilani.
O lea feiloaiga na faailoa ai e le afioga i le Konesula, lona faateia i le tulai mai o le Fono Faufautua, ae ua mae‘a ona faatuina le Fono Aoao a Samoa i lalo o le faamalumaluga a le Konesula ma lona ofisa. Ina ua fesiligia le taitaifono o le Fono Faufautua a Samoa le tofa ia Faatili Ugavau Fuiavailili i sona finagalo i lea mataupu, na ia ta‘ua ai, “E tasi lava le fono a Samoa mai le amataga, o le Fono Faufautua lea.
O le fono lea na ta‘ua e le Konesula o le Fono Aoao a Samoa, e leai se fono faapea o iai, se‘i vaganā ai le fono lea e ta‘ua o le Fono a Faifeau. E lē o manino lelei i le finagalo o le tofa ia Faatili poo le fono a faifeau o le Fono Aoao lava lea a Samoa e pei ona saunoa i ai le Konesula.
O le tulaga maaleale o le mataupu lenei, ona e tatau ona manino lelei poo ai tonu le Fono e tatau ona amanaia pe a potopoto le atunuu, poo le Fono Faufautua poo le Fono a Faifeau poo le Fono Aoao a Samoa.
O loo iai le faamoemoe e fia fesiligia se finagalo o le Afioga i le Konesula, i sona finagalo e uiga i Fono nei e tolu, e ui o lea na agina i lona finagalo i le aso sa feiloai ai ma le Fono Faufautua, o le Fono Aoao a Samoa, o le fono lea sa faatuina e le Konesula ma lona ofisa, ae o le fesili, o ai o auai i le Fono Aoao a Samoa? O ai o taitaia lea fono? O fea foi o faamautu ai ana galuega fai? Auā o le mea moni, e lē o faafofoga lava le atunuu i ni tapenaga ma ni mataupu ‘anoa o aumai i le Fono Aoao a Samoa.
Sisigafu‘a
O le feiloaiga a le Konesula ma le Fono Faufautua, na ioeina ai e le Konesula le faamatuu atu o le Sisigafu‘a o le 2016, e tapena ma faatinoina e le Fono Faufautua a Samoa, o lea ioega a le Konesula, ua atagia mai ai, lona aloaia o le Fono Faufautua, e fua i le tuuina atu o lana ioega e faatino ai e le Fono Faufautua a Samoa o tapenaga a le Sisigafu‘a.
Ae o le fesili sa tulai mai, o ai tonu e tatau ona tapenaina le Sisigafu‘a, o ai e iai le aiātatau ma le paoa e tapena ai le Sisigafu‘a i totonu o Aukilani?
I finagalo o nisi o tamalii o le atunuu ua leva ona tautua ma galulue mo tagata Samoa i totonu o Aukilani, na ta‘ua ai, o le Sisigafu‘a mai le amataga, o le Fono Faufautua lava a Samoa sa tapenaina ma faatino.
E tele foi nisi Sisigafu‘a sa lē auai se Konesula, peitai e lei taofia ai le Sisigafu‘a, auā e iai le talitonuga, o Sisigafu‘a o loo faia i Niu Sila nei, o ni sauniga lava faalotoifale o loo tapena e tagata lautele e patipatia ai le faamanatuina o le Tutoatasi o Samoa, e pei o le upu a le atunuu, “E lele le toloa ae maau i le vaivai.” E leai foi se tupe a le Konesula ma lona ofisa o faaalu i tapenaga o le Sisigafu‘a e ono faamautu ai le mau, o le Konesula ma lona ofisa e pule i le Sisigafu‘a.
O le tulaga masani, e tapena e le Fono Faufautua le Sisigafu‘a ona valaau faaaloalo lea o le afioga i le Konesula e afio mai e auai ma saunoa e fai ma sui o le Malo o Samoa; afai e lē afio mai le Konesula, e filifili lava e le Fono Faufautua se tasi e saunoa i le saunoaga autu o le aso.
Ina ua fesiligia le taitaifono o le Fono Faufautua a Samoa i Aukilani, le tofa ia Faatili Ugavau Fuiavailili i le mataupu lea, na ia saunoa ai, o le galuega tonu lea ma le pitolaau a le Konesula ma lona ofisa o le fuafua ma faataunuu polokalame o le Sisigafu‘a, auā a leai se Konesula ua leai se Sisigafu‘a e faia, auā e lē mafai ona faataunuuina lea faamoemoe pe a leai se Sui o le malo, auā o le galuega lea a le Konesula e fai.
A o le Fono Faufautua ma tagata na o le faamalumalu ma auai, auā e iai foi la latou pito laau e faatinoina o le vaalau o le faifeau ma le aufaipese e taitaiina le sauniga i le Aso Sa.
E mafai ona faataunuu e le Konesula ma lona ofisa le Sisigafu‘a e aunoa ma le auai o le Fono Faufautua, ae lē mafai ona faatino e le Fono Faufautua se Sisigafu‘a pe a lē auai le Konesula.O lea finagalo o le taitaifono o le Fono Faufautua, o loo teena malosi e nisi o tamalii ua loa tausaga o auai ma tautua i le Fono Faufautua, i le talitonuga, e lē sa‘o le finagalo o le taitaifono o le Fono Faufautua.
O le itu e tatau ona manatua, e ui o loo iai pea le ofisa o le Konesula i Aukilani, ae fesuisuiai mai Konesula i lea vaitaimi ma lea vaitaimi. E iai foi nisi o Konesula e omai, e lē mananao e fai ni Sisigafu‘a; e tele foi Sisigafu‘a sa fai e lei auai se Konesula, ae sa faataunuu lava le Sisigafu‘a.
O le lomiga o le vaiaso fou, o le a taumafai e saili atu ai se finagalo o le afioga i le Konesula o Samoa le tofa ia Faolotoi Reupena Pogi e uiga i le Fono Aoao a Samoa, o le a faapea foi ona avatu ai ma le tala otooto o le talaaga o le Fono Faufutua a Samoa i Aukilani, aemaise ai finagalo na faaalia e nisi o Konesula sa nofoia le nofoa na muamua atu ia Faolotoi e uiga i le Sisigafu‘a i totonu o Aukilani.
Polokalame Sisigafu‘a Aukilani 2016
O le polokalame lenei ua ioeina e le Konesula o Samoa i le galuega fai faatasi ma le Fono Faufautua a Samoa mo le Sisigafu‘a o lenei tausaga, ua faamoemoe e faataunuuina i le aso 5 ma le aso 6 o Iuni i le hall a le Ekalesia Aso Fitu Tutoatasi i Magele.
O le Aso 5, o le sauniga lotu lea o le a taitai ai le susuga le faafeagaiga ia Rev Leiite Setefano o le PIC i Glen Innes, faatasi ai ma le lagolago a le Fono aoao a faifeau tuufaatasi, ae o le Aso 6 ua iai le faamoemoe o le a toe tatala le polokalame i se sauniga lotu puupuu ona feiloai lea o le atunuu i le ‘ava o le feiloaiga, sosoo ai ma le sunoaga a le Konesula o Samoa ia Faolotoi Reupena Pogi.
E iai foi se saunoaga mai le Minisita o tagata Pasefika ia Peseta Sam Lotu Iiga, ona sosoo ai lea ma faafiafiaga mai Ekalesia ua lautogia e faafiafiaina le fu‘a o lenei tausaga, ona taualuga lea i le saunoaga faafetai a le taitaifono o le Fono Faufautua a Samoa ia Faatili, e momoli ai le agaga faafetai i le paia ma le mamalu o Samoa o le a auai faapea le Fono a Faifeau o le a lagolagosua i lea faamoemoe, ma tapuni aloaia ai lea o le polokalame.
