E fā tausaga sa a‘otauina ai nisi o tamalii ma faletua ae le gata i lea o susuga i faafeagaiga i le aoga Tusi Paia o le Auckland Pacific Bible College i Papatoetoe, lea e to‘a 6 i latou ua faaiuina ai ma le manuia lo latou taumafai i le Diploma. E to‘a 6 sa aoaoina i le Tusipasi Tele (Advanced Certificate in Biblical Studies), ma le to‘a 12 o i latou na aooga mo le lua tausaga i le Tusipasi Amata (Certificate in Biblical Studies).
O le Aso Toonai, 28 o Me sa tumutumu ai le ARST Community Hall i Magele i aiga, uo ma ē masani aemaise o susuga i faafeagaiga ma o latou faletua sa molimauina lea aso tele.
E ui i le tetele o timuga ma savili ae sa lē tuua ai le titifaitama o mātua i le fia opo ma fusi ma faaula i lana tama ona o lea ua ausia le isi laasaga fou o lona soifua galue i le Atua.
E lē gata i lea ua militino faatasi tagata uma ma pepese ma alalaga fiafia e faafetaia le alofa ma le agalelei o le Atua, ina ua iu le faatamasoaliiga sa galulue punouai ai i le tele o tausaga.
O loimata o le fiafia sa vaaia i le vasega faauu aemaise ai o susuga i faiaoga sa nafa ma lenei galuega fita, ma ua galo nimo ai le vaivai ma le tele o meaaoga ina ua laei i le ofu faauu ma le pulou.
Ua fesootai tapenaga uma o le aso ma le upu folafola na mānavaina ai e le susuga i le faafeagaiga ia Rev Mika Lagavale le upu faauuina a le Atua.
Sa ia faamanatu i le aufaauu ma le mamalu o le auvalaaulia, manuia o le tagata amiotonu ma le malaia o le tagata amioleaga. Na ia timai foi i le vasega faauu, ina ia silasila toto‘a lelei ia latou faaiuga fai aemaise o le va ma tagata, auā o latou ua a‘otauina i le upu a le Atua.
Na sooula lea luitau ina ua pese le alii pule aoga ia Tala Burgess i lona loto fiafia ma ia saunoa ai i le au faaiuaso, ‘o outou o le loketi e fana i le vateatea, tou te lē toe foi mai, auā ua faaaupegaina outou mo le galuega a le Atua.’
O le faletua ia Eseta Ioane-Roach o le pule aoga o le Kolisi o le Tusi Paia a le Pasefika i Ueligitone sa ia tufatufaina tusipasi faatasi ai ma le susuga i le faafeagaiga ia Poni Fonoti.
Tufatufaina o Tusipasi
Tusipasi Amata (Certificate in Biblical Studies)
1 – Malaefilogia Aloalii
2 – Sitoi Ah Mann
3 – Ps. Feagaimaleata Fauo‘o
4 – Ps. Losalia Fauo‘o
5 – Tuiava Viliamu Iopu
6 – Matthew Pace
7 – Vaa Savelio
8 – Aperila So‘onalafo
9 – Anae Sauioge Suavaga
10 – Fuata‘ina Tauofaga
11 – Neemia Sila Tasolo Uelese
12 – Kathleen Uitime
Tusipasi Tele (Advanced Certificate in Biblical Studies)
1 – Sarona Leatigaga
2 – Eni Leiataua
3 – Logonaitana M. Leiataua
4 – Mareta Maliko Tapuai
5 – Lotoifale Talosaga P. Seiuli Puletiuatoa
6 – Misa Ieremia Tagaloa
Diploma
1 – Peter Faafoi
2 – Ps. Alofa Isaia
3 – Fonoia Niko Lee Hang
4 – Eterei Sami Mase
5 – Ps. Leilua Reymond Tamala
6 – Fosi Tolovae
Ae o nisi o faailoga faapitoa sa tauaaoina i le aso, o le Best Overall Student Certificate in Biblical Studies, lea sa maua e le tamaitai ia Malaefilogia Aloalii o le tausaga lua.
O le susuga ia Peter Faafoi sa faamanuiaina i le faailoga o le Best Overall Student i le Tipiloma i le Tausaga 4, i le lelei o le faatinoina o vaega uma i totonu o le kolisi, ma le faletua ia Maria Lagavale sa ia tauaaoina le ipu o le tagata na mua i malae i totonu o le Kolisi i le taimi na faatoa faavae mai ai le aoga i Ueligitone i le aso 30 o Oketopa 2006.
Ua sauni le tausaga lua e faalautele le aoaoga i le sueina o le Diploma mo le isi lua tausaga faatasi ai ma i latou sa sueina le Tusipasi tele.
Na taualuga le faamoemoe o le aufaauu i le saunoaga a le susuga i le faafeagaiga ia Leilua Raymond Tamala o le sui o le aufaauu e momoli le agaga faafetai i faiaoga ma le puleaoga ona o le galuega fita ma le lavelave sa aoaoina ai le upu a le Atua.
O le anavatau ma le manulauti a le Auckland Pacific Bible College, “Ia iloa o Ia, ma faailoa atu o Ia”.
