Aliali pea solitulafono o faiga faamalosi i tamaitai

Faaalia e le sooupu o le matagaluega o leoleo le afioga Taupau Maotaoalii Kaioneta Kitiona, e lē o vasa‘i se vaiaso ma lipoti e oo atu i leoleo o ni solitulafono o faiga tau feusuaiga fai faamalosi e aafia ai tamaitai o le atunuu
Faaalia e le sooupu o le matagaluega o leoleo le afioga Taupau Maotaoalii Kaioneta Kitiona, e lē o vasa‘i se vaiaso ma lipoti e oo atu i leoleo o ni solitulafono o faiga tau feusuaiga fai faamalosi e aafia ai tamaitai o le atunuu

“O le a se‘i faamaopoopo mai faamaumauga ona faailoa lea mo le silafia e le atunuu”…leoleo

O se tamaitai ma sona toalua ua molia faatasi ma se isi taulealea i le aafia i se gaioiga na faatino ai se faiga faamalosi i se isi tamaitai.

O se tamaloa na ia faia foi se solitulafono faapea i sona afafine fai, ma se isi faiga faamalosi na aafia ai se teineititi ei lalo o le 12 tausaga le matua, o mataupu ia ua toe aliali mai i le lipoti a leoleo o le vaiaso ua mavae.

E lei ‘alo le sooupu o le matagaluega o leoleo i lona ioeina o le toe sau i luma o lenei soligatulafono ina ua fesiligia. Faaalia e le afioga Taupa‘u Maotaoalii Kaioneta Kitiona i le fono ma tusitala i le Aso Tofi ua mavae, o faamaumauga lata mai o lenei solitulafono o le a saili mai ma faailoa mo le silafia e le atunuu ina ia latou iloa ai, o loo aafia pea alo tamaitai o Samoa i ni faiga solitulafono faapenei.

O le ulugalii ua molia ma se isi taulealea i le aafia i se taupulepulega e faaoo se solitulafono faapenei, na faaalia e le sooupu, o se tasi lea o tulaga ua agai i ai sailiiliga a leoleo, ona e foliga mai o le tamaitai na aafia, o lona lava uso ma lona toalua lea na taupulepule faatasi ma lea taulealea i le faatinoina o le solitulafono.

“O le fautuaga lava i soo se tamaitai, a iai ni mea faapenei o tau tutupu mai latou te silafia e afaina ai i ni faiga tau feusuaiga fai faamalosi, ona logo vave lea o leoleo”.

O isi mataupu na faailoa e le Sooupu o loo agai i ai suesuega, o le maliu o se alii faigaluega o le Bluesky ina ua pa‘ū mai se pou tau fesootaiga i le lotoā a le kamupani i Malua Fou. E lē o iloa pe o le ā le mafuaaga na tupu ai le faalavelave.

O le isi maliu o se tagata na pule i le soifua ma ua sosoo ai vaiaso o maliliu nisi i le pule i le ola. E lē o maua ni faamaumauga lata mai i le pule i le soifua ae ua faaalia e le Sooupu e lē o ‘asa lava le masina o lenei tausaga ma ni maliu e lipotia atu ona ua pule i le soifua.

O le maea poo se uaea o loo tele ina faaalia e leoleo o loo maua ia latou suesuega sa faatino ai ei latou ua fano soifua lea gaioiga. E lē o mapu le Faataua le Ola, le faalapotopotoga o loo unaia polokalame faailoa e tetee ma faaitiitia ai lenei tulaga, peitai e pei ona silafia e poo le ā lava taumafaiga lelei uma e faasaoina ai ni soifua ua tauau e fano i ni faaiuga faapenei, ae o le faaiuga tutasi lava o le tagata.