‘Ua lote fua e le Malo measina a le atunuu e patino i aiga, nuu ma itumalo’
E toe foi mai i Apia i le vaiaso lenei le faagasologa o faatalatalanoaga, ua tāpa ai se finagalo lautele o Samoa e faatatau i suafa matai ma le faasafua ai e aiga.
O le mau a le Malo ua mafua ai faatalatalanoaga ua faatautaia nei, ua lē mamalu suafa matai ona o le toatele o i latou ua tofia e aiga ma faaee i ai suafa matai aemaise i suafa sa masani lava ona vaaia i tausaga ua mavae sa taitasi lava suli e pale mai ai.
E toatele foi ua lāga finagalo i tausaga ua mavae faapea ua matuā lē mamalu lava le suiga ua iai nei ona ua leiloa se isi e pale mai i suafa tamalii.
O faagasologa o nei faatalatalanoaga ua agai ai le komiti o loo faatalanoaina lenei mataupu i itumalo eseese o le atunuu. E toatele o loo lagolagoina le mau a le Malo peitai o loo iai lava ma lo latou atugaluga i le “… lote fua e le Malo o measina a le atunuu e patino i aiga ma nuu faapea itumalo”.
O le mau a le toatele, o suafa matai o measina e patino i aiga, ma o le faaiuga ina ia faasafua ua faia ona o mafuaaga e pei o nei, ua uluola aiga ma ua taumafai ina ia tofutofusia uma suli i suafa ua faasino ia i latou.
Ua faapea foi ona faaalia e nisi ua faaali manatu i nei faatalatalanoaga, e leai lava se mafuaaga e tatau ai e le Malo ona aapa mai fua i faaiuga fai a aiga, ona o le tasi lenei o auala ua faia e aiga ina ia faaitiitia ai le mafatia o matai e tofi toatasi e pale mai i suafa, auā o le toatele o matai, o le toatele foi lea o i latou e tapa i ai aiga i taimi o faalavelave aemaise o le faatinoga o atinae i totonu lava o aiga.
Ua iai foi ma le finagalo o le toatele, ona pau lenei o le auala ua vaaia ai le nofo filemu o aiga, o le faasafua o suafa auā e tau uma i ai suli moni o aiga. O le isi lava tulaga ua aliae mai i nei faatalatalanoaga, o le tuuaiga lea o le Faamasinoga o Fanua ma Suafa i le malepe ai o faavae e pei ona sa sau a‘i pe afai o le mamalu o loo tulituliloa e lenei mataupu.
O le mau a nisi e pei o Su‘a Molesi sa folasia sona manatu i nei faatalatalanoaga, o le Faamasinoga o Fanua ma Suafa ua tele ina faataape ai le pule o suafa o aiga talu ai le manaoga ina ia tulai mai se filemu i le va o aiga e oo atu i le Faamasinoga i Mulinuu.
O le mau a lea tamalii mai i le amataga o aiga, sa faamamalu ai le tasi o le suafa tāua e tele lava i suafa o tamalii.
O finauga la i le sailia o se tasi e pale mai i nei suafa ua oo ai i le Faamasinoga o Fanua ma Suafa ma o le tele o faaiuga ua vaaia nei o le fautuaina lea e le Faamasinoga lenei o aiga ina ia toe foi i tua e soalaupule nei mataupu ma a lē maua se tasi ma toe foi i Mulinuu ua tele lava ina tofia mai pule o suafa ua lē tasi se itu ae ua tele.
O le mau a Magele Laufala Isaako, o se tasi ua loa tausaga o tautua i le Matagaluega o Autalavou ma Aganuu i tausaga ua mavae, o le tasi lava lea o mafuaaga e tatau ai i aiga ona faasafua suafa auā e taofi ai le faatasina o ona tagata i le Faamasinoga o Fanua ma Suafa, ina ia tau totofi mai ai pule o measina a aiga lava ia. Faaalia foi e Magele e lē talia e se aiga le sau fua o le isi matai tau faasino mai le tulaga e tatau ona agai i ai le faasoaina o ona suafa matai ma ua ia faatusa le aapa mai o le Malo e faia nei faaiuga i lea itu.
Ae ua ia faaalia e taofiofi vevesi e tulai mai i le lumanai pe a faaauau ai ona faasafua suafa – o se auala lea e mautinoa ai le nofo filemu o aiga ma nuu.
