O le ulugalii taulasea Samoa o Sela ma Felaia‘i Lavasii o Levi Saleimoa sa molia i le maliu o se tina talavou na la fofoina lea na faatietie i se paelo vaivevela, ua la faafetaia le faaiuga a le faamasinoga, ua lē faia ai se faasalaga faafalepuipui.
E tolu moliaga sa molia ai le ulugalii, o le fasioti tagata paivalea, faaoomanu‘a tuga, ma le faia o ni togafiti faataulaitu, le witchcraft.
Peitai na faaleaogāina e le faamasinoga le moliaga o le faia o ni togafiti faataulaitu, ae o se faaiuga a se laulau o faatonu na lē faamaonia ai le moliaga o le fasioti tagata paivalea. Sa na o le moliaga o le faaoo manu‘a na faamaonia.
O le faaiuga a le afioga i le faamasino sinia o le faamasinoga maualuga, Lesatele Rapi Vaai ua nofo vaavaaia ai le tina o Sela mo le 18 masina ma le 50 itula e galue ai mo le lelei o le atunuu e aunoa ma se totogi, ae o le tamā o Felaia‘i Lavasii ua faapafala se faaiuga mo ia e aunoa ma se faamaoniga o lana solitulafono lea e ta‘ua o le discharge without conviction.
Na faaalia i le faaiuga a le faamasinoga o le moliaga o le faaoo manu‘a e mafua ona tupu ona ua ita se tagata i se isi tagata, ae e lē o le tulaga lea na tupu i le mataupu lenei pe a fua o le ulugalii sa manaomia le la fofo e togafiti ai se tamaitai na gasegase. “Viia le Alii, faafetai i le Atua i le faaiuga ua aumai e le faamasinoga”, o upu muamua ia na mafai ona saunoa i ai le tamā o Felaia‘i Lavasii ina ua mae‘a ona lauina le faaiuga a le faamasinoga.
E faapea foi se finagalo o le Sela e pei ona ia faaalia lona agaga fiafia ma lona talitonuga o lea ua aumai e le Atua le faaiuga tonu ma sa‘o o moliaga sa tuuaia ai i laua.
O le lē faamaonia ai o le moliaga o le fasioti tagata paivalea e le laulau o faatonu, o le teena lea o molimau a nisi o le aiga o le tina ua maliu na latou tuuaia ai le faatinoga o le fofo na faia, ma ua atagia ai i se silasila a le faamasinoga, ua galo ia i latou le galuega lelei sa faia e le ulugalii.
O le iuga ua taunuu i ai le faamasinoga ua matua talia lelei foi e se tasi o tugane o le tina na maliu.
Ua faaauau pea le galuega a le ulugalii o le faia o fofo ma vai Samoa mo le toatele o tagata o loo manaomia le la galuega e pei ona faaalia e Sela.
“O loo silasila le Atua i le faamaoni o le ma galuega, ma e ui ina salalau tala o lenei mea na tupu, ae e lē o taofia ai le o atu pea o tagata ma tatalo atu i se fesoasoani e ala i le ma taleni mai le Atua”, na saunoa ai le tina o Sela o ia lava e autū i ai le faiga o vai ma fofo a o lona toalua e fesoasoani ia te ia.
