“Ua ou tapena i la‘u koneseti lona selau”, … Felise Mikaele
Ua maua taitaia se tamaitai i Amerika Samoa sa ia toe pueina faagaoi le MTV fou o le Leoleo ma le Mamoe a le susuga Asuao Lealaitagomoa Felise Mikaele ma toe faatau atu, ma o se faanoanoaga lea i le alii pese ona o ituaiga gaioiga faapea e gaugau ai le aufatu pese ma le usu pese o loo atinaeina lea tomai ma taleni pito alumia tele, ona e leai lava se tagata Samoa e lē fiafia i fatuga o pese Samoa malie i le faafofoga ma le faalogologo.
E taunuu le alii pese ma lona faletua i Amerika Samoa ma amata ona faalauiloa lana polokalame pese fou 23 ma lana MTV i le aso na sosoo ai lea na faia i luma ane o le kamupani o le Starkist, ae maua ai loa ma le faaletonu.
O se tamaitai e faigaluega ai lava i le kamupani ua ia toe pue faagaoi ia meatotino (MTV) ma faatau atu.
O le mea e ofo ai le alii pese, pe faapefea ona muamua maua e lea tamaitai ae o lea faato‘ā faatau i tua le atapese MTV.
“E fai si o‘u faanoanoa tele i le mea ua tupu, o lona uiga o le mea lava lea o loo fai nei.
E a matou e tigaina e fatu pese ma tuu i ai fati, toe pue ma MTV e saga faamatagofie ai, ae a isi lava e faotaga tupe mai lo matou afu liligi”, o le finagalo lea o Asuao Lealaitagomoa Felise Mikaele.
O le toe taliu mai i Apia o le alii pese ma lona faletua na ia toe faamatala atili ai le gaioiga a leoleo na faia ma ua molia ai le tamaitai na ia faia lea tulaga. Ae ua faafetaia e le alii pese le alii pule o le kamupani o le Starkist ua mafai ona taofia ai se isi gaioiga faapea e toe tulai mai.
O le molimau foi a Asuao L Felise Mikaele, ua matuā fiafia faleoloa o loo faatauina musika i le teritori ona ua mafai ona maua ni faiga piopio sa lē mafai ona vave taulia ai a latou foi oloa o pese ma MTV.
O le taimi nei foi ua faailoa e le alii pule o le kamupani tuuapa i‘a, o le tagata e toe maua e leai se avanoa na ona taai lava o fala ma alu loa e mālōlō.
O le vaiaso nei e faato‘ā faalauiloa ai i Niu Sila le MTV fou ma le CD 23 a lea tamalii. O le faaiuga o le masina o Aukuso o le a malaga mai ai i Samoa e faia lana koneseti lona 100 e fuafua tonu i le taimi o le Teuila.
E lei faamautuina se nofoaga e faia ai, ae ua faaalia e le alii pese o se koneseti o le a taugofie, ina ia maua ai le avanoa o tagata uma o le atunuu e maimoaina ma faafofoga i lana foi taleni ua foai i ai e le Atua.
Ua lē gata ina lauiloa ai ae ua avea ma atina‘e e maua ai tupe e tausi ai lona aiga ma faatino isi mau galuega ma atina‘e mo le manuia o aiga, nuu ma le ekalesia.
