Ua toe maua mai e le ‘au Netipolo a Aukilani le Northern Mystics lana taalo na amata ai le taamilosaga i ana malo sosoo e lua, ina ua latou faamoamoaina le ‘au a Canterbury Tactics i le Aso Toonai i Waitakere Trust Stadium.
O le lona ono ai lenei o vaiaso o le Taamilosaga Netipolo i ‘au a Niu Sila ma Ausetalia le Trans-Tasman League, ae o le Mystics le isi ‘au a Niu Sila nei lea e toalua ma le Magic a Waikato i ‘au pito sili ona lelei taaalo ma lelei foi tamaitai o loo iai. Ma o ‘au foi ia e lua o loo tauva ma ‘au malolosi a Ausetalia i le faatulagaga.
O nisi o alo o Samoa o loo maualuga le faatinoga o le taamilosaga i le ‘au a Aukilani, o le tamaitai o Maria Tutaia ma le tamaitai o Catherine Latu. O Tutaia o se tasi o sui o le ‘au Netipolo faavaomalo a Niu Sila le Silver Fern, a o Latu o loo taalo mo le ‘au a le tatou atunuu i Samoa. I le taaloga i le Aso Toonai na matuai iloga ai le finau a nei tamaitai o le tatou atunuu aua o i laua uma ia e togi polo ia Auckland Mystics (goal shooter), ma latou manumalo ai i le au a Kalaiesetete i ‘ai e 59 i le 50, e na o le tasi lava le togi a le tamaitai o Catherine Latu na misi mai ana togi e 34 i le mama, a o Maria e 31 ana togi ae na o le 26 na sao i totonu o le mama, ma o se tulaga maoa’e lea ua ausia e ia alo Samoa i le taaloga.
O le taamilosaga netipolo lenei lea o loo mau ai i se tasi o ‘au a Ausetalia le Siamupini mai le tausaga talu ai, a o taalo le tamaitai o Tutaia i le ‘au a Waikato Magic. O lona tausaga muamua lenei talu ona toe foi mai i Aukilani mai le lua tausaga sa iai i le Magic, se’i vagana ai Latu sa taalo lava mo Aukilani talu ona sao atu i le taamilosaga. O se tasi o itu mataina i nei tamaitai Samoa i le taaloga, o le popoto tele e faitau le taaloga ma to’a foi i taimi uma e sauni ai ma le polo i le mama, aemaise lava la Tutaia lea e faatulagaina o se togi mamao pito sili lea ona sa’o o le taamilosaga, e tusa lava poo le a le mamao e velo mai ai e leai ma se masalosalo.
Ua ono taaloga a le ‘au a Aukilani ua mae’a, e tolu manumalo tolu foi faia’ina, ae e lei taitai le taamilosaga ma e tele le avanoa e ono oo ai le Mystics i le suega Siamupini o lenei tausaga. Faamalo ai i nei alo Samoa le taaalo ma le finau i faagatama.
