E iai le talitonuga o loo taufai tutusa uma i tatou i le manuia mai le Atua, i lona alofa ua mafua ai ona ae ai ma le manuia faiva ma galuega o lena foi vaiaso ua tuanai atu. Ae tumau pea le tatalo ina ia faapea ona aveaveai ana faamanuiaga mo i tatou i feau ma tiute o lenei foi vaiaso ua tatou savalia.
O loo taumafai ina ia felanulanuai ma su‘i ula fefiloi la tatou itulau, ina ia suamalie i lau tofo ma matagofie foi i lau faitau.
O i latou ua mavae atu, o nisi ua matutua lo latou soifua, ma ua faasolo foi ina goto le la o le soifuaga i le faitau faaletagata, ae manaia foi pe a tatou asia nisi o loo talavou, ma e lei taitai le soifua i le vaai ma le maitau, a o tulai mai i tofiga ma galuega iloga, ia poo pisinisi foi ua avea ma auala o le latou foi tautua.
Ua manatu ai o le a se‘i tulituliloa nisi o loo ua tulai mai i lenei vaitaimi, a o iai i le soifua talavou ma le talutalufou.
O le vaiaso nei o le a silasila ai ma faitau i le soifuaga o se tasi o tamafanau a le atunuu o loo iai i tausaga talavou, peitai e maoa‘e foi lona tulaga ua tuu i ai e le Atua e auauna ai.
O loo ia faaaogāina le nofoa faataavalevale ona ua lē atoa le malosi o le tino, peitai ua ia ausia nisi o faailoga maualuluga, ma o loo galue foi i galuega masani, ua leai sona eseesega ma le tagata o loo atoatoa le malosi.
E maofa foi le loto ina ua talanoa atu i lenei tamalii, ona o le saili malo e ui ina mafatia le tino, peitai e lei gata ai lona soifua taumafai ma ua faaeaina ai mātua, le aiga, nuu, ekalesia ma le atunuu.
Tuifaasisina Tofilau Karl Gatoloai (BCom. LLB) Suetusi/Loia
Suafa matai:
Tuifaasisina – O le suafa Tuifaasisina e mai le afioaga o Satuimalufilufi i le itumalo o Aana numera lua. O le suafa matai mai le aiga o lona tina ua faaeaina ai ma faasuafaina ai e oo mai i le taimi nei. O se suafa alii poo le tamalii foi e pei ona masani ai le atunuu.
Tofilau – O le suafa na faaee i ai e le isi itu o le aiga o lona tina lava i le afioaga o Iva i le motu tele i Salafai. O le isi foi suafa alii ia poo le tamalii foi i le gagana faigofie a Samoa.
E lua la suafa matai alii o loo umia e le susuga ia Karl Gatoloai lea ua autū i ai lenei vaiaso i le tatou itulau.
