E ui ina vevelatu lea aso, ae na lē mafai lava le lagolagosua ma le loto fia foai ona o le alofa i le faatalauula mai a le mafutaga Ekalesia Metotisi Satufia Satupaitea i Sini nei.
O lenei faamoemoe, na faataunuuina i le PCYC i Minto, i le Aso Toonai talu ai, auā le faamae‘aina o lo latou malumalu. Na tauasa mamao mai ai le susuga i le faafeagaiga Sua Moananu Masoe ma le failautusi o le latou matagaluega, le fetalaiga ia Lia Tamaifita Asiata.
O le susuga i le Sea a le Senoti o ia foi lea o le tausi matagaluega a Livapulu, Rev Halefoti Seloti, na taitaia le sauniga, faafetaia foi le Silisiliese ona o le faamoemoe ua taunuu ma le manuia. Faafeiloai aloaia mai le mamalu lasilasi o si o tatou atunuu, e le tamā agavaa, mau upu ma logo mālie ana fetalaiga, le fofoga o le aso tofa Palea‘e Salelea Timu.
Mataina foi le lagolagosua atu o auauna a le Atua, ma o latou faletua mai ona fata faitaulaga satuafia, e pei o Rev Aloese Filipaina, Taitaifono Aoao, Ekalesia Faapotopotoga Kerisiano Ausetalia & Niu Sila (Puleaga Palagi), ma Rev Itione ma le faletua Pefia Faavae-Eli, Samoan P.I.C. Church Minto.
O nisi foi faafeagaiga mai le Ekalesia Metotisi, e pei o Rev Faagu Toomalatai, Matagaluega Penerifi ma Rev Onehunga Tuaoi, Matagaluega Tonesiana.
E ui ina lei auai nisi faafeagaiga e pei o Saupō Fainifo A.O.G. Claymore, Gagae Uelese Matagaluega Metotisi Sini ma Fiapoto Poloai L.M.S. Toefuataina, ae na faatinoina pea lo latou agaga fia fesoasoani.
E pei ona ta‘ua, e ui ina vevela le nofoaga lea, ae na lolofi atu lava ekalesia eseese, o aiga, uo, paaga ma ē masani, ona o le alofa lava. Ae na faamalie finagalo foi, ona o le solo lelei o musika ma fatuga, a le Tausala Band.
Ua na o le leo o viiga ma le faamanū, ona e faia e le Atua ni vavega ona o lona suafa, lea ua talisapaia ai e le malaga mai Samoa ma le mafutaga le aao foai, e $42,176. Silamio foi le atunuu, ona o le matuā lava saunia ma maualuga faaaloaloga na tapenaina, e tauia mai ai lo latou agalelei.
O le afioga i le fofoga taumomoli o le aso, Toleafoa Kalati, na faasoasoaina oloa faaleaganuu aemaise foi le faatinoina o a tatou tu ma aga e masani ai, e pei o faiva o tautai poto.
E sili lava le manuia o lē na te foai, e pei o le mamalu lasilasi lea na latou alolofa atu i lenei mafutaga, o loo faafoeina e le susuga i le faafeagaiga o le Reformed Christians Churche of the Pacific & Australia i Campbelltown, Susuga Vili Iosua, aao tusitusi Misa Viali ma le teutupe Veni Lematua.
Faato‘ā faavaeina ia Setema 2010, na o le toaiva ona aiga, ma e ui ina popofou ma laiti, ae fai si ona maini i le maopoopo o lana sailiga tupe.
