E tele faalapotopotoga a Samoa i totonu o le aai o Kuiniselani ma e auga uma lava i tautua i le mamalu o le atunuu.
O le tele foi o a latou faagaioiga e faapitoa lea mo nai mātua matutua faapea totonu o aiga, aemaise o le aganuu ma le agaifanua.
O tu faaaloalo o loo faamanatu pea i alo ma fanau sa soifua a‘e i nei atunuu, o le isi lea o a latou mataifaioi o loo faatāuaina pea i taimi uma.
Na atofaina le Aso Toonai ua tuanai atu nei, o se aso e faatāuaina mo taaloga e faafiafiaina ai nisi o tamā ma tina matutua.
O le susuga i le faafeagaiga taulagi ia Ps Tae‘auga Ropati Frost sa taitaia le sauniga amata, ona alo loa lea o le komiti i taaloga ma se taumafataga, faapea le talanoaina o nisi o mataupu e ao ona faaleleia ai pea le auaunaga mo le amataina o lenei tausaga.
E sa‘o lava le tala e fai i le laititi ae ma‘ini auā o le toaitiiti o le mafutaga e faigofie ai ona autasi finagalo e faia faaiuga ma vave taape ai i ni fonotaga.
E leai ni manatu tele e tetee i mataupu a le laulauafono auā e tasi lava le loto ma tasi le agaga o tagata uma.
O nisi o le mafutaga sa lē mafai ona auai i lea aso taalo ona o le faamoemoe a le Ekalesia Katoliko sa faia faatasi i
lea aso.
O le laulauafono o le 2011: Taitaifono – Tofā Iiga Fauono Tavita Limutau; Sui Taitaifono – Soifuā Alo; Failautusi – Agaimalo Toetu Milo; Teutupe – Afoa Maligi Frank.
E iai le faamoemoe o le a maua foi se avanoa i luga o alaleo o le mafutaga a Matai Samoa auā le faalauteleina i le aufaafofoga faapea le avanoa tāua ua faalauiloa ai i luga o le nusipepa a le Samoa Times.
