Tatala le Pelepesite, ina ia taofia ai le soonafai o matai
O le Pelepesite (Plebiscite), o se mataupu sa faifai mālie i ai finagalo o le Fono Faavae, ma o le latou faaiuga foi, sa feteenai ma taiala o faiga faavae a malo e i lalo o le vaaiga a Malo Aufaatasi.
Sa le finagalo le Fono Faavae, e faaaoga le palota o le luasefulutasi tausaga agai i lalo, ona o se faiga sa le tutusa ma le faaupuina o le Faavae sa faataoto.
E faavae i tu ma aganuu, faapea le pulega mamalu a Matai. Sa lei amanaia le lautele o le atunuu, pe a faatusatusa i le faaupuina o le Faavae i lena vaitaimi.
O lona uiga ua na o matai, pe na o i latou ua faasuafaina i matai o aiga e faia tonu, ma o i latou foi ia e iai le malosi e faataga ai ona faia le palota.
O le foi atu o le Faavae tusitusia o Samoa i le Fono Faavae, mo se isi iloiloga, ona sa le taliaina e Malo Aufaatasi, sa toe faamamafa ai ma faataua le aia tatau a tagata lautele e le matai, peitai e iai se taimi o lumanai e faataunuuina ai, ae le mo lena lava vaitaimi o le Tutoatasi. E tele faamatalaga sa tau faamalamalama ai i tagata o le atunuu, le taua o le manino lelei o le faia o le palota, agai i fesili sa tulituliloaina i lena vaitau.
I le palota mo le Tutoatasi o Samoa, sa faataunuuina lava i lalo o faiga malo lelei ma se faiga faauo a Samoa ma Niu Sila. O le fesili sa tuuina mo le mamalu o le atunuu, Pe mananao e tutoatasi Samoa?
O le maea ai o le faitauga o faaiuga mai fale palota e 38 i totonu o le atunuu, na maua ma mautinoa ai le tumutumuga o finagalo o tagata Samoa, e ala i le palota, mo le Tutoatasi o lona Malo.
E tusa ma le 38,000 le aofai o palota, poo le aofaiga foi lea o i latou sa faatinoina le palota mo le Saolotoga o le atunuu.
O le toe lalaga ai e le Tootooalii o le mataupu i le Pelepesite i le vaitaimi o lana faiga malo i le vaitaimi e lei mamao tele atu, sa faia i se faaiuga e taofiofi ai le soona faia o matai i totonu o afioaga ma nuu.
Peitai, e ui i lea manatu o le alii Palemia ia Tofilau Eti Alesana, ae le faaitiitia ai le auga autu, peitai ua atili soona faatoateleina ai ma faatupulaia le manatu i le faia pea o matai i nuu ma afioaga.
O le talitonuga o Aeau Taulupoo Lafaialii, ua avea le Pelepesite, ma mafuaaga o le faatoateleina ma le faaolaolaina o le mau, ina ia saga faia pea nisi matai e tausia aiga ma nuu.
E manatua pea le ato sa tausoa ma le avega sa amo faatasi a tamā o le atunuu, o Taitai foi ia sa tauatia le Fono Faavae ma le Malo o Samoa, i le tau papaluina mai o lona Tutoatasi.
O le Afioga ia Tamasese Meaole, faapea le susuga ia Malietoa Tanumafili II, mai le 1960, ma le 1962, o ni tausaga vevesi i le tapenaina o le Malo Tutoatasi o Samoa.
