O le faasinomaga o le tagata Samoa i lona tupuaga ma ona gafa aemaise o ana measina faapelepele ia puipuia malu mai le aveesea e se isi, o ni vaega tāua ia o loo faamatalatala mai e le ata tifaga o le Silamanino ua pueina ma tuufaatasia e le ETV Production, o se pisinisi pueata o loo umia ma faafoeina e le faletua o Eliza Tiavaasu‘e Hunt.
O lana uluai ata tifaga lea ua tuufaatasia i le tele o tausaga o tautua i le saunia o isi polokalame tau ata e faatau ma maimoa i ai le atunuu o loo alala i Niu Sila ma Ausetalia ma isi vaega o le lalolagi.
“O atunuu i fafo o loo loloto ai le tatou faasamoa faapea foi i totonu o Samoa ae peitai ane e leai se tatou aga i fanua o faia pea i o tatou aiga i lea aso ma lea aso e pei ona faia i Samoa.
Na ou ola a‘e i se aiga e loloto le faasamoa ma o ina na lalaga a‘e ai le faia o le ata lenei ma ua ou faia la lea tala ma aumai i lenei vaitau ou te talitonu e ogatusa lava ma lenei vaitau ia mafai ona iai pea i totonu o laoa ma maota ona o le tala ina ia toe faatāuaina le mafaufau i lou fasinomaga, o fea na e sau ai”.
Faaalia foi e Eliza o le ata o loo faatāua ai foi le tiute ma le malosiaga o le tina i lana pito laau tauave i totonu o le aiga Samoa. O le tamaitai o Verona Parker sa faapaleina i le tausala o Samoa ma manumalo i le tausala o le Pasefika o loo autu i ai le ata. Faaalia e Eliza na ia filifilia lea alo tamaitai o le atunuu ona o ona uiga tausaafia e fetaui tonu ma le agaga o le ata. O Silamanino o le augafaapae lea o le nuu o Savavau o loo faamatala mai i le tala, ma o le a malamalama tagata pe a maua le avanoa e maimoa i ai i le taimi e faalauiloa ai le ata i Samoa i le aso 4 o Iuni 2012.
O le fetalaiga Maulolo Tavita Amosa se tasi sa taulamua i le Faleula o Samoa a o avea ma pule lagolago o le Matagaluega o Tina ma Tamaitai, lea sa ia vaaia le vaega o le lotoifale ma Pulenuu, o loo iai foi lana pitolaau i le ata e le gata o le faufautua mo le itu i le aganuu faasamoa, ae o ia le tuua o le nuu o Savavau e pei ona faamatalaina i le ata tifaga.
O nisi o fanau o loo aoaoina i le Kolisi o Avele o loo aofia ai foi i le ata faapea se tasi o tamalii o le atunuu sa avea ma faiaoga a o se sui foi o le Faleula o Samoa le afioga Te‘o o loo lavea ai i le tala ma le ata tifaga.
O le ata lenei ua faaalia e le tamaitai pule o le ETV ua faia i ai le faaiuga a le Komiti o tapenaga o le Tutoatasi, e aofia i polokalame o le Iupeli auro o le limasefulu tausaga.
O le aso 23 ma le 26 o le masina nei e faalauiloa muamua ai le Silamanino i Aukilani ma Ueligitone i Niu Sila.
