Fesili – E mafai ona maua se refund i tupe ia e totogi i le aoga faataitai a la‘u fanau?
Tali – Afai o iai se lisiti na aumai i le aoga faataitai mo le tupe na e totogiina, ma o lena foi lisiti o loo matamata tetele ai i luga le faaupuga “DONATION” ona mafai lea ona faaaoga le lisiti lena e apalai ai mo se refund.
E le faatagaina lisiti mo le totogiina o pili o le aoga faataitai, ona o le mafuaaga e le o ni donation. Ae mafai ona faaaoga tupe totogi mo pili o le aoga faataitai e tapa ai le “childcare rebate”.
Fesili – Ae faafefea totogi o pili o le aoga tulagalua ma le Kolisi, atoa foi ma le totogiina o api ma mea aoga? O lea e teu faalelei lisiti o le tausaga lea ua tea. E maua se refund pe leai?
Tali – Ou te talitonu o tupe ia e totogi ai pili a le fanau atoa foi ma le totogi o latou api ma isi mea aoga, e le o ni tupe foai fua mo le aoga e aunoa ma se taui. O lena e manino le mafuaaga na ala ai ona totogi tupe i le aoga. E le talafeagai foi ona faaaogā lisiti nei mo se refund.
Fesili – Ae a le $3000 lea na faaaogā ai le tusi siaki a la‘u pisinisi e totogi ai le matou foai mo le aulakapi a Wesley College, lea na maua mai ai le tusi aisi? O loo taalo ai foi lo‘u atalii i le aulakapi lea.
Tali – O le itu pito i tāua ia iai se lisiti mai le aoga, e tatau ona tusi ai i luga le mafuaaga o lenei foai, o le tou tali atu i le suega tupe a le aulakapi.
Ou te talitonu e leai se taui mo lenei foai pe a faapea na foai mo le aulakapi lautele, ae e le o se foai e faapito mo lou atalii lena e iai i totonu o le aulakapi.
Ona o lena sa totogi mai tupe a le pisinisi, e tatau ona faaaoga e le pisinisi lenei foai e faalaitiiti ai lana lafoga totogi.
E le mafai la ona toe faaaoga le lisiti lava lea e tasi e apalai ai mo se refund, ona o lena ua uma ona faaaoga e le pisinisi.
Ae a faapea na taui mai e le aoga le tou foai, e auala mai lea i le lolomiina o le igoa o lau pisinisi i luga o ofu o tama taaalo, e talia foi e le ofisa o lafoga i lalo o tupe alu mo le faalauiloaina atili o lau pisinisi.
Fesili – O si o‘u afafine o le la ua nofomau ma faigaluega i Ausetalia. O lea ua maua mai lana lisiti o lana foai i le lotu.
Ua taunuu mai foi lana pepa IR526 na lafo mai e le Ofisa o lafoga. Ua uma ona ma talanoa ma si o‘u afafine fai mai ou te tago e faatumu le pepa ma ave ma a‘u le refund. Sau fautuaga faamolemole.
Tali – O lena ua aumai e lou afafine le faatagana e te faatumuina lana pepa ma ave ma oe le refund. O lena e fetaui lelei le pepa apalai ma le lisiti o lena e tusi ai lava le igoa o si ou afafine.
Manatua e sui le numera o le tusitupe ina ia alu atu sao le refund ia te oe, ona saini lea o le pepa apalai ma tusi ai le aso, faapipii i ai ma le lisiti ona lafo loa lea pe momoli foi i le Ofisa o lafoga.
Fesili – E fia le totogi amata lea ua iai i lenei vaitaimi e pei ona faatulafonoina?
Tali – Soo se tagata matua faigaluega o le totogi amata o le $13.50 i le itula. Amata ona faamamalu mai lenei tulafono i le aso muamua o Aperila o le tausaga nei.
Fesili – O le a le mafuaaga e ala ai ona eseese tausaga e lipoti ai tala o tupe a ekalesia? O isi ekalesia
e amata ia Iulai ae faauma ia Iuni o le tausaga e sosoo ai. A o isi foi ekalesia e tausaga faatasi ma le malo e amata ia Aperila ae faaiu foi ia Mati o le isi tausaga?
Tali – Afai o se ekalesia o loo faamalumalu i lalo o se faalapotopotoga tele, ua tatau ona iai se faavae poo ni tulafono e mulimuli ai.
O totonu o lenei faavae, e masani ona faataoto mai ai le taimi e fai ai fono faaletausaga, o ina foi la e faatonu mai ai le tausaga e tatau ona faaaogā e nei ekalesia uma e lipotia ai a latou tala o tupe.
Ae afai o se ekalesia fou e leai sona faamalumaluga, e tutoatasi lava ia, e fou foi lana faavae, e masani ona faaaogā le tausaga e atoa i ai le sefululua masina talu mai ona amata pe faatu le lotu.
